भक्तपुर, २ साउन नेकपा (एमाले) को भातृ संगठन राष्ट्रिय युवा संघले ब्युताएको युथफोर्समा भक्तपुरको कमाण्ड रबिन थापालाई दिइएको छ । युवा संघको सूर्यविनायक नगर इन्चार्ज रहेका थापाको नेतृत्वमा भक्तपुरमा युथफोर्स गठन गरिएको हो ।
शनिवार युवा संघद्वारा गुन्डुको जंगलमा आयोजित कमाण्डो तालिमको अवसरमा थापालाई भक्तपुर युथफोर्सको प्रमुख घोषणा गरिएको हो । थापा सूर्यविनायक ५ का स्थानीय युवा हुन् । उनी युवा संघका इन्चार्ज महेश बस्नेत निकट रहदै आएका छन् । युवा नेता दिपक थापाको पक्षमा रहेका रविन पछिल्लो समय दिपक माधव नेपाल तिर लागेपछि बस्नेत क्याम्पमा प्रवेश गरेका हुन् ।
हकी स्वभावका युवा रविन थापाले युवाहरुलाई केन्द्रीत गर्न र परिचालन गर्न सक्ने विश्वास युवा संघले लिएको छ । उनको नेतृत्वमा ६०१ सदस्यीय युथफोर्स गठन गरिएको युवा नेता दिनेश थापाले जनाएका छन् । युवा संघको भक्तपुर अध्यक्षमा भने राजु लुबन्जार रहेका छन् ।
युवा संघका इन्चार्ज एवं नेकपा एमालेका केन्द्रीय सदस्य महेश बस्नेतले युवा संघले राजनीतिक नेतृत्व गर्ने र युथ फोर्स त्यस अन्तर्गत परिचालित हुने प्रष्ट पारेका छन् ।