सानोठिमी, २ माघ २०७८ सानोठिमीस्थित परीक्षा नियन्त्रण कार्यालयको प्रमुखमा अर्जुनबहादुर रायमाझी नियुक्त भएका छन् । उप सचिव रायमाझी राष्ट्रिय परीक्षा बोर्ड अन्तर्गत परीक्षा नियन्त्रण कार्यालय(कक्षा १०) को कामु परीक्षा नियन्त्रक नियुक्त भएका हुन् ।
नवनियुक्त परीक्षा नियन्त्रक रायमाझीले पदभार ग्रहण गर्दै परीक्षा विद्यार्थीको भविष्यसंग जोडिएकोले कार्यसम्पादनमा कर्मचारीहरु जिम्मेवार बन्नुपर्ने बताए । कार्यालयमा आउने सेवाग्राहीलाई मिठो बोलीबचन गर्न र छिटो र त्रुटीरहित सेवा प्रवाह गर्न निर्देशन दिंदै नियन्त्रक रायमाझीले सेवाग्राही मैत्री व्यवहार नगर्ने कर्मचारीहरुलाई कारवाही गर्ने समेत प्रष्ट पारे । विद्यार्थीहरु स्वभावत: छिटो काम खोज्ने स्वभावका हुने भन्दै उनले विद्यार्थीहरुलाई हप्काएर नभई सम्झाई बुझाई कन्भिन्स गर्नुपर्नेमा जोड दिए । परीक्षा नियन्त्रण कार्यालयका कर्मचारीहरुको व्यवहारले विद्यार्थीहरुमा कर्मचारीप्रतिको दृष्टिकोण बन्ने बताउदै उनले मुस्कानसहितको सेवा दिन निर्देशन दिएका थिए ।
निवर्तमान परीक्षा नियन्त्रक रुद्रप्रसाद अधिकारीको शिक्षा,विज्ञान तथा प्रविधि मन्त्रालयमा सरुवा भएसंगै रायमाझी उनको ठाउँमा आएका हुन् । राष्ट्रिय परीक्षा बोर्डका अध्यक्ष महाश्रम शर्माले अधिकारीलाई बिदाइ तथा रायमाझीलाई बोर्डको कार्यालयमा स्वागत गरेका उनका निजी सचिव प्रकाश अवालेले बताए । उक्त अवसरमा अध्यक्ष शर्माले नवनियुक्त परीक्षा नियन्त्रक रायमाझीको कार्यकाल बोर्डका लागि थप प्रभावकारी हुने विश्वास व्यक्त गर्दै आवश्यक निर्देशन दिएका थिए ।