मकवानपुर, ७ माघ मकवानपुर बहुमुखी क्याम्पस हेटौडाका बिद्यार्थीहरु क्याम्पस प्रशासनमाथि आक्रोसित बनेका छन । क्याम्पस हुनेखानेको लागि मात्र रहेको र गरीब बिद्यार्थीहरुमाथिको दायित्वबाट बिमुख भएको भन्दै बिद्यार्थीहरु आक्रोसित बनेका हुन् ।
आर्थिक स्थिति कमजोर भएको कारण समयमै शुल्क बुझाउन नसकेका बिद्यार्थीहरुको बोर्ड परीक्षा छुटाउने नियतले परीक्षा फाराम नपठाएको आरोप बिद्यार्थीहरुको छ । उनीहरुले क्याम्पस प्रशाशनले बिद्यार्थीहरुमाथी अन्याय गरेको जिकिर गरेका छन ।
स्नातक तह तेस्रो बर्षमा अध्यनरत केही बिद्यार्थीहरुले आर्थीक अवस्थाका कारण समयसीमा भित्र मासिक शुल्क बुझाउन नसक्दा क्याम्पसले परीक्षा फारम भर्न नदिएको बिद्यार्थी नेता रामकृष्ण सिवाकोटीले इभक्तपुरलाइ जानकारी गराए । क्याम्पस प्रशाशनले स्वेच्छाले आफ्नो फारम पठाएर आफुलाई फकाउन खोजेको तर आफुहरुको माग व्यक्ति केन्द्रित नभएर प्रक्रियासँग सम्बन्धित भएको नेता सिवाकोटीले बताए । तेस्रो बर्षका बिद्यार्थीहरुको मासिक शुल्क औसतमा रु एक हजार रहेको छ ।
माओबादी केन्द्र निकट बिद्यार्थी संगठन अखिल ( क्रान्तिकारी ) र नेपाली काँग्रेस निकट ने.बि.संघले आर्थिक स्थिति कमजोर भएकै कारण विद्यार्थीको भविष्यमाथि खेलवाड गर्ने क्याम्पस प्रशाशन बिरुद्ध मोर्चाबन्दी गरेका छन । परीक्षा फाराम छुटाएका सबै बिद्यार्थीहरुलाई परीक्षामा सामेल गराउन उनीहरुको माग छ ।
यी दुई संगठन मिलेर क्याम्पसमा तालाबन्दी समेत गरेका छन । क्याम्पस प्रशाशन जिम्मेवार ढंगले प्रस्तुत हुदैन भने आन्दोलनको क्षतीको जिम्मेवार स्वयम् हुने उनीहरुले बिज्ञप्ती मार्फत चेतावनीसमेत दिएका छन ।
यस सम्बन्धमा क्याम्पस प्रमुख बच्चुराम अधिकारी संग सम्पर्क गर्न खोज्दा सम्पर्क हुन् सकेको छैन ।