राष्ट्रिय परीक्षा बोर्डले कक्षा ११ को परीक्षाफल प्रकाशन गर्ने तयारी गरेको छ । शनिवार कक्षा ११ को परीक्षाफल प्रकाशित हुने बोर्ड श्रोतले बताएको हो ।

श्रोतका अनुसार परीक्षाफल सम्बन्धी सम्पुर्ण तयारी सकिएपछि शनिवार दिउसोको लागि बोर्ड बैठक बोलाइएको छ । बेलुकी ४ बजे परीक्षाफल प्रकाशन हुने श्रोतको दावी छ ।

जेठ ९ गते सकिएको कक्षा ११ को परीक्षाको परीक्षाफल बोर्डको इतिहासमै पहिलोपटक यति छिटो प्रकाशित हुन लागेको हो । बिगतका बर्षहरुमा पौष मसान्तसम्ममा परीक्षाफल प्रकाशन हुँदै आएकोमा यसपटक ३ महिना अगाडि नै बोर्डले सम्पुर्ण तयारी सकाएको छ ।

५ लाख ४८ हजार परीक्षार्थीहरु सामेल भएको यस परीक्षामा २ लाख १५ हजार आंशिक परीक्षार्थी रहेका छन् । नियमित विद्यार्थीहरु भन्दा आंशिक विद्यार्थीहरु रिजल्टबाट बढी लाभान्वित हुने देखिएको छ । बिगतका बर्षहरुमा ढिलोगरि रिजल्ट हुँदा विद्यार्थीहरुको बर्ष खेर जाने गरेको थियो तर यसपटक ३ महिना अघि नै रिजल्ट हुने भएपछि विद्यार्थीहरुले विश्वविद्यालयमा भर्ना हुन पाउने भएका छ्न ।

परीक्षा बोर्डमा कृष्ण शर्मा परीक्षा नियन्त्रक भएसंगै बोर्डले चामत्कारिक रुपमा रिजल्टको समय छोट्याएको छ । कक्षा १२ को परीक्षाफल प्रकाशनको कार्य पनि यस अघि छोटो समयमै सप्पन्न भएको थियो ।