भक्तपुर, १७ मङ्सिर एक महिनामै ८ लाख बढी ठगी गर्ने २ जना भक्तपुरबाट पक्राउ परेका छन् । अनलाइन विज्ञापन गरी सस्तोमा सामान दिने भनी ठगी गर्ने उनीहरु प्रहरीको फन्दामा परेका हुन् ।
उनीहरुलाई महानगरीय अपराध अनुसन्धान महाशाखाको विशेष टोलीले पक्राउ गरेको हो । पक्राउ पर्नेमा सिन्धुपाल्चोकको साँगाचोकगढी घर भई भक्तपुर बस्ने अमिर थापा र भक्तपुर कमलविनायकका अमन अवाल रहेको प्रहरीको महानगरीय अपराध अनुसन्धान महाशाखाले जनाएको छ ।
महाशाखाका प्रमुख रहेका एसएसपी सहकुलबहादुर थापाले जनाए अनुसार अनलाइनबाट सम्पर्कमा आएका उपभोक्तालाई ठगी गरेको भन्ने सूचनाको आधारमा थापा र अवाललाई पक्राउ गरिएको हो ।
विदेशबाट ल्याइएको ब्रान्डेड घडी, मोबाइल,ल्यापटप लगायतका सामान सस्तोमा दिने बिज्ञापन गरेर सम्पर्कमा आएका उपभोक्ताको पैसा ठग्ने कार्यमा उनीहरु संलग्न रहेको प्रहरीको भनाइ छ ।
उनीहरूलाई थप अनुसन्धान गर्न महानगरीय प्रहरी परिसरको जिम्मा लगाइएको महाशाखाले जनाएको छ । साथै, ठगीएको कुरा गोप्य नराखी शङ्कास्पद गतिविधि देखिएमा प्रहरीलाई खबर गर्न समेत प्रहरीले अनुरोध गरेको छ ।