भक्तपुर, ५ पुसभक्तपुरको कमलविनायक र च्याम्हासिंहमा अधिकांश औषधि पसलहरु अवैध भएको पाइएको छ । भक्तपुर नगरपालिकाले गरेको औषधि पसल अनुगमनका क्रममा अधिकांश औषधि पसलहरु अवैधरुपमा संचालन भएको पाइएको हो ।
कमलविनायक र च्याम्हासिंह क्षेत्रका अधिकांश औषधि पसलहरु दर्ता तथा नवीकरण नै नगरी अवैधरूपमा सञ्चालनमा रहेका नगरपालिकाका अनुगमन समिति संयोजक राजकृष्ण गोराले बताए । त्यतिमात्र होइन, अनुगमनमा अधिकांश औषधि पसलहरुमा औषधिसम्बन्धी ज्ञान नै नभएका मानिसले औषधि बिक्री गरिरहेको पाइएको समेत बताइएको छ ।
अनुगमनमा कमलविनायक फर्मा, विनायक फार्मेसी, हेलो जनस्वास्थ्य फर्मा, च्याम्हासिंह मेडिकल हलले दर्ता नवीकरण नगरेको देखिएको छ । त्यतिमात्र होइन, ति औषधि पसलले फोहर भएको, म्याद नाघेको औषधिहरु छुट्टै स्थानमा भण्डारण नगरी बिक्री गर्ने ठाउँ मै राखिएको पाइएको अनुगमन समितिले जनाएको छ ।
अनुगमन समिति संयोजक गोराका अनुसार सो क्षेत्रका अधिकांश औषधि पसलहरु अवैधरुपमा संचालन भएको पाइएपछि कारवाही प्रक्रिया अघि बढाइएको छ । औषधी जस्तो अति संवेदनशील बस्तुको व्यापारमा औषधि पसल संचालकको अवैधानिक कार्य मान्य नहुने उनको भनाइ छ ।