१९ माघ २०७६काठमाडौं । नवयुग श्रेष्ठले दुई गोल गरेपछि त्रिभुवन आर्मी क्लबले शहीद स्मारक ए डिभिजन लिगमा विभागीय डर्बी भिडन्तमा नेपाल पुलिसलाई पराजित गरेको छ । दशरथ रंगशालामा आइतबार भएको खेलमा आर्मीले पुनरागमन गर्दै पुलिसमाथि ४-२ को शानदार जीत हात पारेको हो । पुलिसले दुई पटक अग्रता लिएर पनि कायम राख्न सकेन ।जीतपछि आर्मी १० खेलबाट २३ अंक जोड्दै २४ घण्टापछि नै अंकतालिकामा शीर्ष स्थानमा फर्किएको छ ।
जारी लिगमा २३ अंकसहित नेतृत्व गरिरहेको छ । आर्मीलाई १० खेलमा २२ अंक जोडेको मछिन्द्र क्लब पछ्याइ रहेको छ ।खेलमा पुलिसका लागि १९ औं मिनेटमा बुद्ध बल तामाङले गोल गर्दै टिमलाई सुरुवाती १-० को अग्रता दिलाएका थिए भने ३४ औं मिनेटमा आर्मीका सुमन अर्यालले गोल फर्काउँदै पहिलो हाफ १-१ गोल बराबरी सकिएको थियो ।
तर, दोस्रो हाफमा पुलिसका मानबहादुर परियारले गोल गर्दै आर्मीलाई दबाबमा पार्न सफल भएका थिए । उनले खेलको ५८ औं मिनेटमा नीर कुमार राईको कर्नरमा गोल गरेका थिए ।पुलिससँग २-१ गोलले पछि रहेको आर्मीका लागि खेलको ७७ औं मिनेटमा विवेक बस्नेतको क्रसमा नवयुग श्रेष्ठले गोल गर्दै टीमलाई २-२ को बराबरी भएको थियो ।
खेल २-२ को बराबरीमा रहँदा आर्मीका नवयुग श्रेष्ठले व्यक्तिगत दोस्रो तथा टीमका लागि उत्कृष्ट गोल गरेका थिए । नवयुगले खेलको ८५ औं मिनेटमा गोल गरेका हुन् ।
यस्तै खेलको ८९ औं मिनेटमा आर्मीका सुदील राईले टीमका लागि चौथो गोल गरेका थिए ।यो सँगै नवयुगले जारी लिगमा व्यक्तिगत ६ गोल पूरा गरेका छन् । लिगमा नवयुग र च्यासल युवा क्लबका सन्तोष साहुखल सर्वाधिक गोलकर्ता बनेका छन् ।दुवै खेलाडीको ६ गोल गरेका छन् ।पराजित पुलिसको १० खेलमा १४ अंक रहेको छ ।