भक्तपुर, १३ फागुनसंबिधान सभा सदस्य समेत रहेकी नेपाल मजदुर किसान पार्टीकी केन्द्रीय सदस्य अनुराधा थापामगरले नेमकिपाका कारण अमेरिका थुरथुर भएको भनेकी छन् ।
मंगलवार काठमाडौस्थित अमेरिकी राजदुतावास अघि विरोध सभालाई सम्बोधन गर्दै उनले भनिन्, ” अमेरिका बिरोधी नेपाली जनलहर देखेर ओली सरकार र अमेरिकी दुतावास मात्र होइन, ह्वाइट हाउस पनि थुरथुर भएको छ । यहाँ तैनाथ सुरक्षाकर्मी त्यसको प्रमाण हो ।”
मिलेनियम च्यालेन्ज कर्पोरेशन (एमसीसी ) को बिरोध गर्न नेमकिपाले अमेरिकी दुतावास अघि गरेको बिरोध सभामा बोल्दै थापामगरले एमसीसी पास गराउने प्रधानमन्त्री लगायतको भनाइ प्रति आपत्ति जनाइन् । एमसीसी देश बिरोधी संझौता भएको भन्दै उनले एमसीसी नरोके नेपाली जनताको बिद्रोहलाई कसैले रोक्न नसक्ने चेतावनी दिइन । एमसीसीका नाममा नेपाल पस्न खोजेको अमेरिकालाई नरोके नेपालमा अमेरिकी सेना परेड खेल्ने उनको जिकिर छ ।
उनले एमसीसी फिर्ता लैजान अमेरिकी राजदुत बेरीलाई अझै मौका रहेको भन्दै अन्यथा जनविद्रोहको आधिबेहरीले अमेरिकी साम्राज्यबादलाई परास्त गर्ने बताइन् ।