भक्तपुरमा कोरोनाको एक संक्रमित थपिएको स्वास्थ्य मन्त्रालयले पुष्टि गरेको छ । शुक्रबार साँझ भक्तपुरकी एक महिलालाई कोरोना पोजेटिभ देखिएको पुष्टि भएको हो ।

मन्त्रालयका सह प्रवक्ता डा समिर कुमार अधिकारीले जनाए अनुसार संक्रमित महिला भक्तपुर नगरपालिका वडा नम्बर ९ की हुन् र उनको उमेर ४२ वर्ष रहेको छ । उनको रास्ट्रिय जनस्वास्थ्य प्रयोगशालामा गरिएको पिसिआर रिपोर्टमा कोरोना पोजेटिभ देखिएको हो ।

यससंगै भक्तपुरमा संक्रमितको संख्या ४ पुगेको छ जसमा १० दिन अघि कोरोना सङ्क्रमित पुष्टि भएका दुवाकोटका २७ वर्षीय सुरक्षाकर्मी पुरुष र थिमी बस्ने २५ वर्षीया स्वास्थ्यकर्मी युवती बिहीबार डिस्चार्ज भएका छन् । भक्तपुरकी प्रमुख जिल्ला अधिकारी हुमकला पाण्डेले कोरोना नियन्त्रणमा आफूहरु योजनावद्ध लागिरकेकोले नआत्तिन तर सावधान रहन अनुरोध गरेकी छन् ।

शुक्रवार देशभर कुल कोरोना संक्रमितको संख्या ५ सय १६ पुगेको छ ।