सत्तारुढ दल नेपाल कम्युनिष्ट पार्टी(नेकपा)को युवा दस्ता राष्ट्रिय युवा संघ नेपालको भक्तपुर जिल्ला इन्चार्जको जिम्मेवारी दिनेश थपलिया’आक्रोस’लाई दिइएको छ । उक्त संघले भक्तपुर जिल्ला इन्चार्जमा थपलियालाई सर्वसम्मत चयन गरेको हो ।

राष्ट्रिय युवा संघ नेपालको केन्द्रीय सदस्य रहेका थपलिया भक्तपुरको पार्टी जिल्ला कमिटीका सदस्य समेत हुन् । उनी तत्कालीन नेकपा (माओबादी केन्द्र) का जिल्ला नेता एवं योङ्ग कम्युनिष्ट लिग (वाइसिएल)को भक्तपुर जिल्ला अध्यक्ष थिए ।

२०५७ सालदेखि तत्कालीन नेकपा (माओबादी) काे पूर्णकालीन सदस्य भई उनी भुमिगत भएका थिए ।२०५८ चैत्रमा गिरफ्तार परेपछि तत्कालीन शाही सत्ताले उनलाई चरम यातना दिएको थियो । २ वर्ष जेल जीवन बिताएका थपलिया यातनाबाट कत्तिपनि बिचलित नभई जनयुद्धमा आफ्नो योगदान दिएका थिए । थपलिया पार्टीभित्र बफादार र इमान्दार युवा नेताको रुममा परिचित छन् ।

थपलियालाई भक्तपुर जिल्ला इन्चार्जको जिम्मेवारी दिएको राष्ट्रिय युवा संघ नेपालले दिपक दाहाललाई सहइन्चार्जको जिम्मेवारी दिएको छ । दाहाल तत्कालीन नेकपा एमालेको भातृ संगठन युवा संघका भक्तपुर अध्यक्ष रहेका थिए । नेकपाका केन्द्रीय सदस्य समेत रहेका प्रभावशाली नेता महेश बस्नेत राष्ट्रिय युवा संघ नेपालका केन्द्रीय इन्चार्ज हुन् भने अर्का केन्द्रीय सदस्य रामप्रसाद सापकोटा दिपशिखा केन्द्रीय सहइन्चार्ज हुन् । बस्नेत र सापकोटा दुवै भक्तपुरवासी हुनाले पनि भक्तपुरको युवा नेतृत्वको बिशेष महत्व रहेको देखिन्छ ।