भक्तपुर, १६ कात्तिकबिश्वब्यापी महामारीको रुप लिएको कोभिड १९ का कारण पढाई मात्र होइन, सभा सम्मेलन समेत अनलाइनमा सिमित भएका छन् । तर, खाने मुखलाई जुंगाले छेक्दैन भने झैँ यस विषमताका बाबजुद सांगीतिक एवं साहित्यिक लगायत विभिन्न प्रतियोगितालाई पनि अनलाइनमै सम्पन्न गरिंदै आएको देखिन्छ ।
यसैबीच अनलाइनबाट सम्पन्न एक नृत्य प्रतियोगितामा भक्तपुरकी सगुन श्रेष्ठ प्रथम बन्न सफल भएकी छन् । इन्नोभेसन इभेन्ट मेनेजमेन्टद्वारा आयोजित उक्त प्रतियोगितामा श्रेष्ठ प्रथम भएकी हुन् । अनलाइन डान्स कम्पिटिसन २०२० नाम दिइएको उक्त प्रतियोगितामा विद्यालय उमेरका १ सय बढी प्रतियोगी सहभागी भएका आयोजकको भनाइ छ ।
प्रतियोगितामा प्रतिस्पर्धी रहेका १ सय बढी प्रतिष्पर्धीलाई पछि पार्दै उपाधी जित्न सफल सगुन श्रेष्ठ सूर्यविनायक नगरपालिका वडा नम्बर २ बालकोटकी हुन् । उनी थिमीस्थित नवरत्न इङ्लिस स्कूलमा कक्षा ९ मा अध्ययनरत छिन् । गत माघमा पनि उनले अमर कला केन्द्र कालिमाटीद्वारा आयोजित उपत्यकाव्यापी ‘लेट्स डान्स’ को चौथो संस्करणमा फस्ट रनर अपको उपाधी हात पारेकी थिइन् ।
अनलाइन डान्स कम्पिटिसन २०२० मा भने उनले टाइटल उपाधि नै हात पारिन् । यसमा कमल राज , स्वजन रघुबंसी र महेश केसी निर्णायकको भूमिकामा रहेका थिए । प्रतियोगितामा अविनव श्रेष्ठ फस्ट रनर अप र गर्दिशा मल्ल सेकेन्ड रनर अप घोषित भएका थिए ।