भक्तपुर, २३ कात्तिकमहानगरीय प्रहरी प्रभाग, कटुन्जेले उद्धार गरी ल्याएको चितुवाको बच्चा भनिएका जंगली जनावरका बच्चाहरु बन कार्यालयको जिम्मा लगाइएको छ । प्रहरीको रोहबरमा बनका कर्मचारीहरुले जंगली जनावरका उक्त बच्चाहरु सूर्यविनायकस्थित जंगलमा छोडिदिएका छन् ।
आइतवार बिहान करिब ११ बजेको समयमा प्रहरी सहायक निरीक्षक मनोज सर्राफको नेतृत्वमा रहेको प्रहरी टोलीले जंगली जनावरको बच्चा फेला पारी उद्धार गरेको थियो । कटुन्जे र किवाचोकबीच रहेको घट्टेखोला लिफ्ट खानेपानी आयोजनास्थित क्षेत्रमा चितुवा रहेको सूचनाको आधारमा खोज्दै जाँदा २ वटा बच्चा फेला पारि प्रहरीले बन कार्यालयलाई जिम्मा लगाइदिएको हो ।
खानेपानीका एक कर्मचारीले प्रहरीलाइ चितुवा देखेको खबर गरेपछि हेर्दैजाँदा प्रहरीले ठूलो पाइप भित्र चितुवाको जस्तै बच्चा फेला पारेकाे र उद्दार गरेको हो । कटुन्जे प्रभागमा आएर स्थानीय मानिसहरुले ती जनावरको कौतुहलतापूर्वक अवलोकन गरेका थिए । स्थानीय आतंकित बनेपछि जंगली जनावरका ती दुई बच्चालाई प्रहरीले उद्धार गरेको र दिउँसो बनका कर्मचारीलाई हस्तान्तरण गरेको प्रभागले पुष्टि गरेको छ ।
प्रभाग प्रमुख रहेका प्रहरी नायब निरीक्षक ज्योतिप्रकाश कार्कीका अनुसार उद्धार गरिएका बच्चाहरु चितुवाकै भए नभएको बारेमा यकिन भएको भने छैन । चितुवा वा बनबिरालोको बच्चा भन्नेमा यकिन नभएपनि ती बच्चाहरुलाई बन कार्यालयको जिम्मा लगाइएको र सूर्यविनायकस्थित जंगलमा छाडिएको कार्कीले जनाएका छन् । स्थानीयले भने बस्तीमा चितुवा देखिनु र चितुवाकै जस्तो बच्चा प्रहरीले फेला पार्नु संयोग हुन नसक्ने भन्दै प्राणि उद्यानले बस्तीमा बन्यजन्तुलाई आउँनबाट रोक्न थप सतर्कता अपनाउनुपर्ने आवश्यकता औल्याएका छन् ।