भक्तपुर, ३ फागुन भक्तपुरमा मादक पदार्थ सेवन गरेर सवारी चलाउनेहरु ट्राफिक प्रहरीको फन्दामा पर्न थालेका छन् । कोभिड-१९ को जोखिमका कारण मापसे चेकिङ्ग नहुने अनुमान लगाउदै सवारी चलाउनेहरु ट्राफिक प्रहरीको फन्दामा पर्ने गरेका हुन् ।
औसतमा दैनिक ५ जना सवारी चालक मादक पदार्थ सेवन गरेको अवस्थामा फेला पारी कारवाही गर्दै आएको महानगरीय ट्राफिक प्रहरी कार्यलय भक्तपुरले जनाएको छ । चेकिङ् प्वाइण्ट बनाएर चेकचाँज गर्दा दिनहुँ औसतमा ५ जना कारवाहीमा पर्ने गरेका हुन् । महानगरीय ट्राफिक प्रहरी महाशाखाको निर्देशनपछि चेकिङ् कडा पारिएको ड्युटीमा खटिएका प्रहरीले बताएका छन् ।
भक्तपुर ट्राफिक छ लेन सडकमा मात्र होइन, स्थानीय सडक र गल्लीमा समेत मापसे जाँचको मेसिन लिएर ड्युटीमा तैनाथ रहेको देख्न सकिन्छ । भक्तपुर ट्राफिकका प्रमुख रहेका प्रहरी निरीक्षक सुमन न्यौपानेका अनुसार जिल्लामा १० ठाउँमा मापसे जाँचका लागि प्रहरी परिचालन गरिएको छ । जाँचस्थल भने सधै एकै नहुने र त्यो फरक ठाउँमा रहने उनले जनाएका छन् । स्थानीयको गुनासो र मापसेकर्ताले प्रयोग गर्ने सम्भावित सडकलाई मध्यनजर गर्दै जाँच स्थल निर्धारण गर्दै आएको उनले जानकारी दिए ।
मापसे जाँच छल्ने चालकले दुर्घटनालाई भने छल्न नसक्ने जिकिर गर्दै न्यौपानेले मापसे गरेर सवारी चलाउदा सडकमा अरु समेत असुरक्षित हुने कुरामा गम्भीर बन्नुपर्ने आवस्यकता औल्याएका छन् । मापसे चाँजलाई अनावस्यक दुखका रुपमा नभई सडक सुरक्षाको रुपमा बुझ्न आम सवारी चालकलाई उनले अनुरोध समेत गरेका छन् । मापसे चेकिङ कडा पारिएको भन्दै प्रहरी निरीक्षक न्यौपानेले सबैलाई नियम अनुसार चल्न अपिल गरे ।