२०७७ चैत्र १ गते, आईतबारभक्तपुर नगरपालिकामा फागुन २९ गतेदेखि सञ्चालित अन्तर नगरपालिका बुद्धिचाल प्रतियोगिताको दोस्रो र तेस्रो चरणका खेलहरु आज सम्पन्न भयो । खेलमा ललितपुर मनपा र हेटौडा उपमनपा समान ६ अंकका साथ संयुक्तरुपमा शिर्ष स्थानमा रहेका छन् । ललितपुरले दोस्रो खेलमा भक्तपुर नपालाई ३.५—०.५ अंकले हराए भने तेश्रोमा भिमेश्वर नपालाई रोचक प्रतिस्पर्धात्मक खेलमा २.५—१.५ अंकले विजय प्राप्त गरेको थियो ।
त्यसैगरी हेटौडाले दोस्रो राउण्डमा काठमाडौं गोकर्णेश्वर नपालाई २.५—१.५ अंकले र तेस्रोमा काठमाडौं महानगरलाई ३—१ ले पराजित गरे ।
स्वीस लिग ७ राउण्डको खेल हुने प्रतियोगितामा झापाको दमक नपा २ जित र एक बराबरी गरी ५ अंकका साथ तेस्रो स्थानमा छन् । दमकले दोस्रो राउण्डमा काठमाडौंको नागार्जुन नपालाई ४—० ले हराए भने तेस्रोमा काठमाडौंको गोकर्णेश्वर नपासित बराबरी खेल भयो ।
त्यसैगरी भक्तपुर नपाका दुबै टिम समान ४ अंकका साथ संयुक्तरुपमा तेस्रो स्थानमा रहेका छन् । यस्तै गरी कामनपा, टोखा नपा, मेचीनगर नपा, भिमेश्वर नपा र बनेपा नगरपालिकाले पनि समान ४ अंक जोडेका छन् ।
भोलि बिहान ८ः०० बजे नै चौथौं र अपरान्ह १ः३० बजे पाँचौ चरणका खेलहरु हुने छ ।