भक्तपुर, १५ चैतभक्तपुरको चाँगुनारायण नगरपालिका वडा नं ९ ताथलीमा करिब रू दुई करोडको लागतमा निर्माण सम्पन्न खानेपानीको उद्घाटन गरिएको छ । ताथलीको इथाचा खानेपानी तथा सरसफाइ उपभोक्ता समितिले करिब ५ वर्ष लगाएर निर्माण सम्पन्न गरेको खानेपानीको शनिबार नेपाल मजदुर किसान पार्टीका सचिव एवम् संघीय सांसद प्रेम सुवालले उद्घाटन गरेका हुन् ।
खानेपानीको उद्घाटनसँगै लामो समयदेखि खानेपानीको अभाव झेलिरहेका इथाचावासीको समस्या समाधान भएको छ । समितिले नियमितरूपमा खानेपानी वितरण गर्ने कार्यतालिका समेत बनाएको छ । सो ठाउँको खानेपानी समस्या समाधानका लागि स्थानीय आफै सक्रिय भएर लागेको जनाउँदै सांसद सुवालले खानेपानी वितरणका लागि प्रभावकारी तरिका अपनाउनुपर्ने बताए । उनले मानिसका लागि अत्यावश्यक खानेपानी सुविधा पुर्याउने जिम्मा सरकारको भए पनि सरकारले जनताको दैनिक समस्या सााधानमा ध्यान नदिएकोप्रति असन्तुष्टि जनाउँदै जनताको समस्या समाधानका लागि जनता नै सचेत र सजग हुनुपर्ने बताए ।
खानेपानी उपभोक्ता समितिको पहिलो साधारणसभाको अवसरमा सांसद सुवालले एकलाख लिटर क्षमताको पानी ट्यांकी र पानी शुद्धिकरणक लागि जडान गरिएको फिल्टरको समेत उद्घाटन गरे ।
२०७२ सालको वैशाख १२ गतेको विनासकारी महाभुकम्पले स्थानीयले वर्षौंदेखि उपभोग गर्दै आइरहेको पानीको मूललाई असर गरेको थियो । त्यही कारण इथाचा, मसाण्डोल, ताल्वा, माथुडाँडा र ढमलाडोकाका वान्सिदाहरु खानेपानी समस्यामा परेका थिए ।
सो समस्याबाट छुटकारा पाउन स्थानीयले नकुल प्रजापतिको नेतृत्वमा समिति गठन गरेको समितिका धनबहादुर श्रेष्ठले बताए । उनले ठूलो संघर्ष र मिहिनेतपछि ताथलीको इथाचावासीले शुद्ध खानेपानी उपभोगको अवसर पाएको जानकारी दिँदै अझ व्यवस्थित गर्न जरुरी रहेको बताए ।