निषेधाज्ञामा समाचार संकलनका लागि हिडेका पत्रकारलाई नरोक्न भक्तपुरका सिडिओ प्रेमप्रसाद भट्टराईले आदेश दिएका छन् । बिहिवारबाट शुरु निषेधाज्ञाको कुनै पनि दिन पत्रकार परिचय पत्र बोकेर हिडेका पत्रकारलाई नरोक्न उनले आदेश दिएका हुन् ।

सिडिओ भट्टाराईले सूचना बिभागद्वारा जारी परिचय पत्र नभएता पनि सम्बद्ध संचार गृहको परिचय पत्रका आधारमा आवतजावत गर्न दिन आदेश दिए । प्रहरी प्रमुख रहेकी एसपी तारादेवी थापालाई उनले उक्त व्यवस्थाका लागि आदेश गरेका हुन् ।

नेपाल पत्रकार महासंघ भक्तपुर शाखाका अध्यक्ष जगतकृष्ण प्रजापति, सचिव संजीप घिमिरे र कार्यसमिति सदस्य रामगोपाल तमखु लगायतका पत्रकार सामु एसपी थापालाई आदेश दिंदै उनले कोरोना भाइरस संक्रमण रोकथाम र नियन्त्रणका लागि पत्रकारहरुको साथ् र सहयोगको अपेक्षा समेत गरेका छन् । सिडिओ भट्टराईलाई भेट्न जिप्रका पुगेको नेपाल पत्रकार महासंघ भक्तपुरको टोलीले निषेधाज्ञामा संचार गृहको परिचय पत्र बोकेर समाचार संकलनमा हिडेका पत्रकारलाई नरोक्न आग्रह गरेको थियो । उक्त अवसरमा अध्यक्ष प्रजापतिले प्रेस ज्याकेटको दुरुपयोग गर्ने र नक्कली परिचय पत्र बोकेर हिड्नेहरुलाई कारवाही गर्न महासंघले सघाउने समेत बताएका थिए ।