नेकपा (माओवादी केन्द्र) भक्तपुरले जिल्लास्थित सरकारी अस्पताललाई स्वास्थ्य सामाग्री हस्तान्तरण गरेको छ । पार्टीको उपल्लो कमिटीबाट प्राप्त स्वास्थ्य सामाग्री कोभिड अस्पतालको रुपमा रहेको भक्तपुर अस्पताललाई हस्तान्तरण गरिएको हो ।

बुधवार स्वास्थ्य सामग्री लिएर पार्टीका जिल्ला इन्चार्ज दिलिपकुमार प्रजापति ‘भिष्म’ , नेता देवेन्द्र श्रेष्ठ दिवाकर, अध्यक्ष डीपी ढकाल, प्रदेश सांसद प्रतिमा श्रेष्ठ लगायतका नेताहरु दुधपाटीस्थित भक्तपुर अस्पताल पुगेका थिए । उनीहरुले अस्पतालका अध्यक्ष मिलन सुवाललाई भेटी स्वास्थ्य सामाग्री हस्तान्तरण गरेका हुन् ।

पार्टी प्रयोजनका लागि उपल्लो कमिटीले उपलब्ध गराएको स्वास्थ्य सामाग्री अधिकत्तम जनताको हितमा प्रयोग होस् भन्ने उदेश्यले सर्वसाधारण जनताको पहुँचमा रहेको भक्तपुर अस्पताललाई हस्तान्तरण गरिएको अध्यक्ष डीपी ढकालले जानकारी दिए । अध्यक्ष ढकालले जनाए अनुसार पीपीइ सेट, अक्सिमिटर, मास्क, सेनिटाइजर लगायतका स्वास्थ्य सामाग्री अस्पताललाई हस्तान्तरण गरिएको हो ।

इन्चार्ज प्रजापतिको नेतृत्वमा रहेको टोलीले अस्पतालको कोभिड उपचारको अवस्थाबारे जानकारी लिनुका साथै अवलोकन समेत गरेको थियो । कोभिड विरुद्धको लडाइमा स्वास्थ्यकर्मीहरुको योगदानको उच्च प्रशंशा गर्दै नेताहरुले अस्पताललाई आवस्यक सहयोग र समन्वयका लागि नेकपा माओवादी केन्द्र सधै तयार रहेको बताए । उक्त अवसरमा अस्पतालका अध्यक्ष मिलन सुवालले माओवादी केन्द्र बाट आफूहरुलाई सदैव हौसला प्रदान गरिएको प्रति आभार प्रकट गरे । आफ्नो पार्टी पंतिका लागि आएको स्वास्थ्य सामाग्री अस्पताललाई प्रदान गर्नुले ठुलो अर्थ राख्ने भन्दै उनले नेतृत्वको प्रशंसा गरे ।

यसैबीच बिहीबार नै उक्त टोलीले जनसेवा समाज भक्तपुरका लागि पनि स्वास्थ्य सामाग्री हस्तान्तरण गरेको छ । समाजका सहसंयोजक एवं सामाजिक परिचालक राम प्रजापतिले स्वास्थ्य सामाग्री ग्रहण गर्दै पार्टीप्रति आभार प्रकट गरेका छन् ।

उक्त अवसरमा माओवादी नेताहरुले कोभिडको डरलाई बिर्सिएर जनताको सेवामा लागेका समाजका परिचालकहरुको प्रशंशा गर्दै समाजसेवा सबैभन्दा ठूलो कार्य भएको र यो सबैको बशको बिषय नभहेको भनेका छन् । उनले निस्वार्थ समाजसेवामा लागेका सस्था र अभियन्ता नै राष्ट्रका गहना भएका भन्दै आफूहरु सधै उनीहरु संगै रहने प्रतिवद्धता प्रकट गरे ।