भक्तपुर, १३ कात्तिक २०७८भक्तपुरको चाँगुनारायण नगरपालिका वडा नम्बर ३ गेलाल गाउँका भोला दाहाल निजामती सेवाको सहसचिवमा नाम निकाल्न सफल भएका छन् । लोकसेवा आयोगले लिएको परीक्षा उतीर्ण गर्दै उनी शुक्रबार खुला प्रतिस्पर्धाबाट सहसचिवमा नाम निकाल्न सफल भएका हुन् ।
माता राधिका र पिता सिताराम दाहालका सुपुत्र भोला दाहालले मुखियाबाट सेवा प्रवेश गरेका र प्रत्येक तहमा खुला प्रतिस्पर्धाबाट नाम निकालेका उनका साथीसमेत रहेका नेपाल राष्टिय कर्मचारी संगठन(निजामती) का नेता कुबेरप्रसाद दाहालले बताए । पढाईमा अब्बल र लगनशील भोलामा पदको दम्भ कहिल्यै नदेखिएको स्थानीयहरु बताउँछन् । मुखिया-खरिदार-नासु-शाखा अधिकृत-उपसचिव हुँदै सहसचिव सम्म ६ वटै पदमा खुला प्रतिस्पर्धामा नाम निकालेर भोलाले लोकसेवा आयोगप्रतिको भरोसा लाई समेत प्रमाणित गरिदिएका छन् । आफ्नो धरातल कसैले पनि बिर्सनु नहुने बताउने भोलाले आफ्नो नामको पछि ‘धरातल’ थपेर भोला धरातलको परिचय बनाएका छन् ।
२०५४ सालमा हुलाकको मुखियाबाट सेवा प्रवेश गरेका भोला हाल करिब ४० वर्षका छन् । राजपत्रांकित प्रथम श्रेणीमा खुला प्रतिस्पर्धाबाट नाम निकालेसंगै उनले निजामती सेवाको उच्च पद मुख्यसचिव बन्ने ढोका खोलेका उनका साथीहरू बताउँछन् ।