भक्तपुर, २४ मंसिर २०७८नेकपा(माओवादी केन्द्र) भक्तपुरका सह इन्चार्ज समेत रहेका नेता देवेन्द्र श्रेष्ठ दिवाकर पार्टीको केन्द्रीय विज्ञान तथा प्रविधि विभागमा सदस्य मनोनित भएका छन् । उनले शुक्रबार पार्टी मुख्यालय पेरिस डाँडा पुगी उक्त पदको शपथ ग्रहण समेत गरेका छन् ।
दिवाकर जनयुद्धका बैज्ञानिकको रुपमा परिचित व्यक्तित्व समेत हुन् । आविष्कारमा अभिरुची राख्ने उनी पछिल्लो समय अस्पतालमा अक्सिजन प्लान्ट जडान कार्यमा व्यस्त बनेका छन् भने नेपाली विद्यार्थीलाई रकेट बनाउन सहयोग गरी चर्चामा आएका छन् ।
यसअघि उनलाई बागमती प्रदेशको सुशासन समितिको संयोजकको जिम्मेवारी प्राप्त भएको थियो । पार्टी खुला राजनीतिमा आएपछि नेवा: राष्ट्रिय मुक्ति मोर्चाका महत्वपूर्ण जिम्मेवारीमा रहेर उनले काम गरेका छन् । हाल उनी मोर्चाको महासचिव समेत हुन् । समाजसेवामा पुर्याएको योगदानका लागि रास्ट्रपति विद्यादेवी भण्डारीबाट उनले मानपदवी समेत प्राप्त गरेका छन् ।