भक्तपुर, १ पुस २०७८ नेकपा (माओवादी केन्द्र)को युवा संगठन वाइसिएल नेपाल भक्तपुरले मतदानमा सबैलाई सहभागिताको सुनुश्चितताका लागि ध्यानाकर्षण गराएको छ । बिहीवार जिल्लास्थित निर्वाचन कार्यालय मार्फत प्रमुख आयुक्तलाई पत्रचार गर्दै सो ध्यानाकर्षण गराइएको हो ।
वाइसिएल भक्तपुरका इन्चार्ज दिनेश थपलिया आक्रोश र संयोजक नरेश रंजितको नेतृत्वमा रहेको टोली भक्तपुर स्थित कार्यालय पुगी ध्यानाकर्षण पत्र पेश गरेको छ । निर्वाचन आयोगले अनिवार्य बसाईसराई खोजेको र यो व्यवहारिक नभएको वाइसिएलले ठहर गरेको छ । निर्वाचनको लागि मतदाता नामावली संकलन गर्ने कार्य भइरहेको र बसाईसराईको प्रमाणपत्रलाई अनिवार्य प्रावधान वनाइएको हुँदा उक्त कार्यले निर्वाचन प्रक्रियामा सामेल हुन पाउने मौलिक हक हनन हुन पुगेको र मतदानबाट बन्चित गर्न खोजिएको पत्रमा बताइएको छ । अघिल्ला निर्वाचनमा खानेपानी, बिजुली लगायतका बील तिर्नेगरी बसोबास गरेका व्यक्ति र घर, जग्गा भएका वा अस्थायी टहरा हाली बासोबास गरेकालाई समेत मतदानको अवसर प्रदान गरेकोमा यसपटक त्यस्ता व्यक्तिलाई निशेध गरिएको आरोप लगाइएको छ ।
मतदाता परिचय संकलन प्रक्रियालाई सहज बनाउनुको साटो जटिल बनाउदा नेपालको संविधान २०७२ को धारा १८ र ४२ उल्लङ्घन भएको पत्रमा भनिएको छ । त्यतिमात्र होइन, नागरिकलाई सहज रुपले मतदान गर्ने अवसर प्रदान नगर्नु भनेको निर्वाचन आयोग ऐन २०७३, मुलुकी देवानी संहिता २०७४ को नागरिक हक सम्बन्धी व्यवस्थाको प्रतिकुल भएको वाइसिएलको भनाइ छ ।
जुनसुकै ठाउँमा बसोबास गरेको भएपनि उमेर पुगेको नागरिकले मतदाता नामावलीमा संकलित हुन पाउने र मतदान गर्न पाउने वाइसिएलले जिकिर गरेको छ ।