भक्तपुर, १७ फागुन २०७८नेपाल मजदुर किसान पार्टीका अध्यक्ष नारायणमान बिजुक्छेंले सत्ता साझेदार दल नेकपा (माओवादी केन्द्र)का अध्यक्ष प्रचण्डलाई तर्साइएको बताएका छन् । अमेरिकी सहयोग परियोजना एमसीसी पास गराउन प्रचण्ड लाई तर्साइएको अध्यक्ष बिजुक्छेंले बताएका हुन् ।
मंगलवार भक्तपुर नगरपालिकाद्वारा पुनर्निर्माण गरिएको न्हू: पुखु (रानीपोखरी)को उद्घाटन कार्यक्रमलाई सम्बोधन गर्दै अध्यक्ष बिजुक्छेले प्रचण्डमा अन्तर्राष्ट्रिय अदालत जानुपर्ने डर रहेको आरोप लगाए । प्रचण्डको सोही डरमा टेकेर अमेरिकाले तर्साएको उनको भनाइ छ ।
अध्यक्ष बिजुक्छेंंले माओवादीले जनयुद्धको नाममा हत्याहिंसा गरेर आएको र त्यो विषय अन्तर्राष्ट्रिय अदालतमा लगेर फासी दिने भन्दै प्रचण्डलाई डर देखाउदा उनी एमसीसीको पक्षमा उभिएका दावी गरे । अध्यक्ष बिजुक्छेंले एमसीसीमा गरिएको ब्याख्यात्मक टिप्पणी एकपक्षीय भएको जिकिर गर्दै त्यसको कानुनी अर्थ नहुने तर्क गरे ।
उनले एमसीसी रास्ट्रघाती भएको भन्दै पास गराउने नेता र पार्टीको पक्षमा उभिने कार्यकर्ता पनि दोषी हुने उल्लेख गरे । उक्त अवसरमा उनले उक्त दलमा रहेका एमसीसी विरोधी कार्यकर्ताहरुलाई आफ्नो दलमा ल्याउनु पर्ने आवश्यकता समेत औल्याए । अझै पनि १ सय ५० देशमा आफ्नो सेना राखेर हैकम चलाइरहेको संयुक्त राज्य अमेरिका संग एमसीसी सम्झौता गर्न संसद बाट पास हुनु दुःखद् भएको बताएका अध्यक्ष बिजुक्छेंले सत्तारुढ दल नेपाली कांग्रेस र अन्य सत्ता साझेदार दल र प्रमुख प्रतिपक्षी दल नेकपा एमालेका लागि भने कुनै शब्द खर्चिएनन् ।
कार्यक्रममा संघीय सांसद एवं नेमकिपाका सचिव प्रेम सुवालले समेत माओवादी केन्द्रका अध्यक्ष प्रचण्डप्रति मात्र आक्रोश पोखे । प्रचण्डले एमसीसीको बिरोध गर्ने नेमकिपालाई जनताले साथ नदिएको र महाकाली सम्झौताको विरोध गर्ने बामदेवको तत्कालीन पार्टी नेकपा माले लाई जनताले पराजित गराएको भन्दै जनताको अवमूल्यन गरेका सुवालको आरोप छ ।
उक्त अवसरमा प्रदेश सांसदद्वय सुरेन्द्रराज गोसाइँ, सिर्जना सैजु, नगर उपप्रमुख रजनी जोशी,भक्तपुर सिडिओ रुद्रादेवी शर्मा,सस्कृतीविद तेजेश्वरबाबु ज्वङ्ग, इतिहासविद गौरीबहादुर कार्की, प्राडा पुरुसोत्तम्लोचन श्रेष्ठ, पत्रकार लक्ष्मण जोशी लगायतले न्हू: पुखु पुनर्निर्माण गरी भक्तपुर नगरपालिकाले नगरबासीमा गुन लगाएको बताएका थिए । नगरप्रमुख सुनिल प्रजापतिको अध्यक्षतामा सम्पन्न कार्यक्रमको संचालन वडाध्यक्ष रवीन्द्र ज्याख्व:ले गरेका थिए ।