सवारी चालक अनुमती पत्रको लागि अनलाइन फाराम भरेका सबैले परीक्षामा सहभागी हुन पाउने ग्यारेन्टी गरिएको छ । यातायात व्यवस्था कार्यालय जगातीका कार्यालय प्रमुख नेत्रप्रसाद भट्टराईले फाराम भरेका सबै आवेदक परीक्षामा सामेल हुन पाउने जनाएका हुन ।

अनलाइन फाराम भरेकालाई बैशाख मसान्त भित्र सम्पर्क राख्न सूचना गरिएपछि मानिसहरुमा उक्त मिति पछि सम्पर्क गर्न नपाइने र पुन: आवेदन भर्नुपर्ने भ्रम रहेको उनको भनाइ छ । ”हामीले थाती रहेका काम छिटो सकाऔ भनेर सूचना गर्यौ तर आवेदकहरुमा भ्रम उत्पन्न हुँदा कार्यालयमा भीड बढ्यो।” उनले भने ।

कार्यालय प्रमुख भट्टराईका अनुसार अत्याधिक भीड बढेपछि आइतवार एक अर्को सूचना प्रकाशित गरी सम्पर्क गर्ने मिति बढाएर जेष्ठ १५ गतेसम्मको समय दिइएको छ । यो समय भित्र डिसेम्बर सम्मको सम्पर्क मिति पाएका सबै आवेदकलाई सेवा दिन सकिने उनले जानकारी गराए । यद्यपी त्यो नै अन्तिम मिति पनि नभएको उनको भनाइ छ ।

कार्यालय प्रमुख भट्टराईका अनुसार कार्यालयको कामलाई कोभिड अघिकै जस्तो नियमित बनाउन पुरानो आवेदनलाई एकसाथ किनारा लगाउन खोजिएको हो । उनले यस्ता आवेदक अब करिब ५ हजारको संख्यामा मात्र रहेका जानकारी गराउदै जेष्ठ महिनाभरीमा त्यसको काम सकिने विश्वास व्यक्त गरे । पुराना आवेदकको काम सकाएसंगै सवारी चालक अनुमती पत्रको प्रेसर घट्ने र कार्यालय पुरानै लयमा फर्कने उनले बताए । कार्यालय प्रमुख भट्टराई जगाती आएको करिब एक महिना भएको छ । यातायात ब्यवस्था कार्यालयमा उनले सेवाग्राही मैत्री नेतृत्व गर्दै आएका छन् ।