नेकपा एमालेका अध्यक्ष एवं पूर्व प्रधानमन्त्री केपी शर्मा ओलीले गरेको मतदानले एमाले उम्मेदवार जिताउन सकेन । सूर्यविनायक नगरपालिका वडा नं २ बालकोट निवासी ओलीले मतदान पछि सहज जित हासिल हुने दावी गरेका थिए । तर, अध्यक्ष ओलीको वडामा कांग्रेसका वडा अध्यक्ष उम्मेदवार प्रदीप कार्की पुरै प्यानल सहित निर्वाचित भएका छन्।
प्रदिपले १ हजार ५ सय ११ मत पाएर विजयी हुँदा एमालेका विश्वराज भट्टले १ हजार ३ सय ५ मत मात्र पाएर पराजय भोग्न वाध्य भए । ओलीको वडामा उत्साहका साथ निर्वाचनमा सहभागी एमालेका नेताहरुलाई निरास बनाउदै खुला वडा सदस्यका उम्मेदवारमा पनि काग्रेसका जर्नादन खड्का १ हजार ४ सय ७६ र भगत रानाले १ हजार ४ सय २२ मत ल्याएर विजयी भएका छन् ।
त्यसैगरी, काग्रेसका महिला उम्मेदवार कल्पना खतिवडा(दाहाल) १ हजार ५ सय २९ तथा महिला सदस्यमा
रन्जिता तिखत्री १ हजार ५ सय १७ मत पाएर विजयी भएकी छन् ।
अहिलेसम्म सूर्यविनायकका वडा नंं १ र २ को मतगणना सम्पन्न भएको छ । वडा नम्बर १ मा एमालेले जीत हासिल गरेपनि नगरप्रमुखका उम्मेदवार काग्रेसका निशान ढुंगेलको अग्रता कायम छ । ढुंगेलले ३ हजार १ सय ३१ मत पाउँदा एमालेका नगर प्रमख उम्मेदवार बासुदेव थापाले २ हजार ७ सय ६० मत पाएका छन् । अहिले वडा नं ३ को मतगणना भइ रहेको छ ।