भक्तपुर,१५ साउन २०७९उद्योग मन्त्रालयका सचिव अर्जुनप्रसाद पोखरेलले ग्रील ग्राम तोक्नेतिर लाग्न व्यवसायीहरुलाई सुझाव दिएका छन् । ग्रील तथा स्टील व्यवसायी महासंघ नेपालको २७ औ साधारणसभाको शनिबार भक्तपुरमा उदघाटन गर्दै सचिव पोखरेलले उक्त सुझाव दिएका हुन् । ग्रीलको महत्व अत्याधिक रहेकोले छुट्टै औद्योगिक ग्रामको आवश्यकता औल्याउँदै उनले भने, “अव तपाईहरुले हामी यहाँं वस्छौं भनी अधिकार स्थापित गर्नुपर्यो जुन ठाउँंमा एक दुई सय ग्रील र स्टिल उद्योगहरु एकैठाउँंमा होस् र बस्तीमा असर पनि नपुगोस ।” कार्यक्रममा उनले महासंघका उत्कृष्ट इकाइहरुलाई प्रमाणपत्रबाट सम्मानित समेत गरेका थिए । 
महासंघका अध्यक्ष प्रदीप कटुवालको अध्यक्षतामा सम्पन्न कार्यक्रममा नेपाल घरेलु तथा साना उद्योग महासंघका अध्यक्ष उमेशप्रसाद सिंह, नेपाल चेम्वर अफ कमर्सका उपाध्यक्ष सुरेन्द्रकुमार श्रेष्ठ लगायतले ग्रिल व्यवसायीका विभिद् समस्याहरुबारे सरकारको ध्यानाकर्षण गराए । उनीहरुले ग्रिल व्यवसायीको हितलाई सरकारले ध्यान दिन नसकेको र साना लगानीको सुरक्षा नगरेको गुनासो गरेका थिए ।