भक्तपुरको निर्वाचन क्षेत्र नम्बर १ मा घरदैलो पछि लोकतान्त्रिक बाम गठबन्धनका उम्मेदवार उत्साहित बनेका छन् । मतदाताले अपार माया दिएका संघीय उम्मेदवार सुनिल गोठे बासुले बताए ।

नेकपा (माओवादी केन्द्र) का जिल्ला संयोजक समेत रहेका गोठेसंग प्रदेश १ भक्तपुर नगर क्षेत्रमा पवन भुजु र प्रदेश २ चाँगुनारायण र भक्तपुर- १० नगर क्षेत्रमा सुरेश श्रेष्ठ प्रदेश सभाका लागि उम्मेदवार रहेका छन् । दुवै प्रदेश क्षेत्रमा नेपाली काँग्रेसका उम्मेदवार संग घरदैलोमा हिडिरहेका प्रतिनिधि सभा सदस्य उम्मेदवार सुनिल गोठेलाई काँग्रेस नेता कार्यकर्ताले बराबरी माया गरिरहेका उनले बताए ।

”घरदैलोमा हिड्दा फरक पार्टीका कार्यकर्ताहरु संग पनि छु भन्ने फिलिंग नै हुन दिनुभएन ।” उनले भने । गठबन्धन दलका कार्यकर्ताको एकता लोभलाग्दो भएको उनको भनाइ छ । उम्मेदवार नभएपनि एकीकृत सामजवादीका कार्यकर्ता पनि घरदैलोमा उत्तिकै उत्साहपूर्वक सहभागी भएका उनले अनुभव सुनाए । यस्तै अनुभव काँग्रेस उम्मेदवार भुजु र श्रेष्ठको पनि रहेको छ ।

भक्तपुरमा स्थानीय शासक दलको निरंकुशता, खानेपानी र रोजगारीको समस्यालाई लिएर मतदाताले बढी चिन्ता गरेका उनले बताए । त्यसैगरी चाँगु नारायणमा मूख्यत: यातायातको असुविधा, पहिरोको समस्या,कृषकका समस्या, शिक्षा, स्वास्थ्य र रोजगारीको विषयमा मतदाता चिन्तित रहेका उनले सुनाए ।

मतदाताको आशा र भरोशा देख्दा आफूहरुको आत्मबल अझ बढेको उम्मेदवार सुनिल गोठेले बताए । गठबन्धनका सबै उम्मेदवार युवा रहेकाले मतदाताले आफ्नै भाइ, छोरा नातिको रुपमा माया प्रदर्शन गरेका गोठेले बताए ।

मतदाताले आगामी सरकार गठबन्धनकै बन्ने देखिएकाले आफूहरुको गठबन्धनप्रति बढी अपेक्षा रहेको बताएका थिए ।