नेकपा एमालेका पोलिट्ब्युरो सदस्य एवं पूर्वमन्त्री महेश बस्नेतले बिकल्प बिना काठमाडौँ महानगरले सुकुम्बासी बस्तीमा डोजर लगाउन नहुने बताएका छन् । यसले भलो नगर्ने उनको भनाइ छ ।
सामाजिक सञ्जाल फेसबुकमार्फत टिप्पणी गर्दै बस्नेतले भनेका छन्, ‘कठ्याग्रिदो जाँडोमा गरिबको बस्ती उठाएर कसैको भलो हुँदैन, म फेरि पनि भन्छु उचित समयबिना विकल्प र बिना क्षतिपूर्ति, गरिब, सुकुम्बासी र साना व्यवसायीलाई उठाएर बिच्चल्ली बनाउन पाइँदैन ।’
उनले जनतालाई आन्दोलन गर्न बाध्य पार्ने अनि नगर प्रहरीहरु घाईते गराएर फाइदा लिने तत्व रहेको जिकिर गर्दै यसले जनता र देशलाई भने फाइदा नहुने बताए । उनले यस किसिमका हर्कत नगर्न समेत सरोकारवालालाई चेतावनी दिएका छन् । सुकुम्बासी बस्ती हटाउन परिचालित नगर प्रहरी र बस्तीबासी बीच झडप हुँदा दुबै पक्ष घाइते भएका छन् भने नगर प्रहरी प्रमुख अस्पताल नै भर्ना भर्ना हुनुपरेपछि तत्कालका लागि महानगर पछि हटेको छ । सोमबार दिउँसो थापाथलीस्थित सुकुम्बासी बस्तीस्थित अवैध संरचना हटाउने क्रममा स्थानीयले ढुंगामुढा प्रहार गरेपछि घाइते भएका प्रहरी प्रमुख राजु पाण्डेलाई भेट्न काठमाडौ महानगरका मेयर बालेन साह अस्पताल पुगेका थिए ।
