भक्तपुर, २५ मंसिर २०७९प्रतिनिधि सभातर्फ भक्तपुरका थप २ जना सांसद बन्ने भएका छन । भक्तपुरका समानुपातिक उम्मेदवारलाई उनीहरुको पार्टीले मनोनित गरे संगै २ सांसद थपिने भएका हुन् । यस अघि प्रत्यक्ष तर्फबाट प्रेम सुवाल र दुर्लभ थापा प्रतिनिधि सभामा निर्वाचित भएका छन् भने समानुपातिकबाट थप २ जना थपिने भएका हुन् ।
समानुपातिकबाट प्रतिनिधि सभामा पुग्न सफल भएकाहरुमा नेपाली काँग्रेसकी रमा कोइराला पौडेल र राष्ट्रिय स्वतन्त्र पार्टीका नेता सन्तोष परियार रहेका छन् । उनीहरु आवद्ध पार्टीले उनीहरुलाई मनोनित गरेको पत्र निर्वाचन आयोगको कार्यालयमा पठाएको हो ।
प्रतिनिधि सभा सदस्यमा सिफारिस भएकी काँग्रेसकी रमा कोइराला पौडेल भोजपुरबाट राजनीति शुरु गरी पछिल्लो समय भक्तपुरको सूर्यविनायक नगरपालिकास्थित दधिकोटमा बस्दै आएकी छन् । भक्तपुरबाटै पार्टीको महाधिवेशन प्रतिनिधि निर्वाचित हुँदैं केन्द्रीय सदस्य समेत निर्वाचित भएकी कोइरालाले ट्रेड युनियन काँग्रेसको नेतृत्वमा रहेर राजनीतिमा योगदान गरेकी छन् ।
यसैगरी राष्ट्रिय स्वतन्त्र पार्टी बाट सिफारिस भएका सन्तोष परियार पनि सूर्यविनायक नगरबासी नै हुन् । सूर्यविनायकको गुन्डु निवासी नेता परियार रास्वपाको सुत्रधार मध्येका मानिन्छन । उनी नेकपा एमाले परित्याग गरी रवी लामिछाने नेतृत्वको रास्वपा निर्माणमा लागेका नेता हुन् ।