भक्तपुर, २२ पुस २०७९जिल्ला प्रशासन कार्यालय भक्तपुरले सेवा प्रवाहमा समय कार्ड शुरु गरेको छ। छिटो छरितो र प्रभावकारी सेवा प्रवाहका लागि शुक्रवार बाट समय कार्ड शुरु गरिएको हो । कार्यालयले सेवाको समयअवधि नै तोकेर सेवा शुरु गरेपछि सेवाग्राही समेत खुशी देखिएका छन् । सेवाग्राहीले यसको निरन्तरता हुनुपर्ने प्रतिक्रिया दिएका छन् ।
जिल्ला प्रशासन कार्यालयकी प्रमुख जिल्ला अधिकारी रुद्रादेवी शर्माले सेवा प्रवाहलाई थप विश्वासिलो र प्रभावकारी बनाउन समय कार्ड अनुसार सेवा शुरु गरिएको बताइन । प्रमुख जिल्ला अधिकारी शर्माले सेवाग्राहीलाई कार्यालयले दिएको समयमा काम सम्पन्न नभएको गुनासो आए आफूले तुरुन्तै सुनुवाई गर्ने समेत जनाएकी छन् ।
जिल्ला प्रशासन कार्यालयले प्रदान गर्दै आएको १ दर्जन सेवामा समय कार्ड अनुसार सेवा दिन थालिएको सूचना अधिकारी एवं सहायक प्रमुख जिल्ला अधिकारी माधव प्रसाद शर्माले जानकारी गराएका छन् । उनले दिएको जानकारी अनुसार नयाँ नागरिकता लिन आउने सेवाग्राहीलाई ४५ मिनेट भित्र नागरिकता उपलब्ध गराउने समयसीमा तोकिएको छ । त्यसैगरी संस्था नवीकरणका लागि ३० मिनेट, जनजाति, दलित, मधेसी लगायत सिफारिस १५ मिनेट, राहदानीको इनरोल् मेन्ट ३० मिनेट, र राहदानी वितरणका लागि १५ मिनेट तोकिएको छ ।
जिल्ला प्रशासन कार्यालय भक्तपुरले राष्ट्रिय परिचय पत्रको विवरण दर्तालाई ३० मिनेट र राष्ट्रिय परिचय पत्र वितरण लाई १५ मिनेटमा सेवा प्रदान गर्ने सहायक सिडिओ शर्माले बताए । त्यसैगरी मुद्दा पेशी र तारिख १५ मिनेट, फैसला बढीमा ६० दिन, नाबालक प्रमाण पत्र दिन ४५ मिनेट लाग्ने बताइएको छ । पेन्सन सिफारिसका लागि १ घण्टा र हातहतियार नवीकरण आधा घण्टामा गर्ने गरी समय तोकिएको छ ।
समय कार्ड अनुसार सेवा प्रवाह गर्दा सेवा थप प्रभावकारी भएको र सेवाग्राही समेत सन्तुष्ट देखिएका प्रशासकीय अधिकृत उर्मिला खतिवडाले बताएकी छन् । कर्मचारीलाई समेत यसले जिम्मेवार बनाएको बताउदै उनले समय व्यवस्थापनको दृष्टिले पनि यो सेवाप्रवाहका लागि बैज्ञानिक तरीका भएको बिश्वास व्यक्त गरिन । सेवाका लागि अनावश्यक हतार गर्ने सेवाग्राहीका लागि समेत यो बिधि उत्तम भएको कर्मचारीले प्रतिक्रिया दिएका छन् ।
आवश्यक कागजपत्र पुरा नभएका सेवाग्राहीले भने आवश्यक कागज पुर्याएपछि मात्र समय कार्ड शुरु हुने जिप्रकाले जनाएको छ ।समय कार्ड शुरु हुनु अघि प्राथमिकतामा सेवा पाइरहेका अपाङ्गता भएका, असक्त, जेष्ठ नागरिक, दुधे बच्चा बोकेको महिला लगायतलाई प्राथमिकतामै राखी सेवा गरिने व्यवस्था मिलाइएको छ भने कार्यालयमा आउँन नसक्ने अवस्थामा रहेका अपाङ्गता भएका नागरिकका लागि घरमै पुगी सेवा दिने व्यवस्था लाई निरन्तरता दिइएको जिप्रकाले जनाएको छ ।
प्रधानमन्त्री प्रचण्ड नेतृत्वको सरकारले सेवालाई थप प्रभावकारी बनाउन र लाइनमा घन्टौं कुर्नुपर्ने अवस्था अन्त्य गर्न ७७ वटै जिल्ला प्रशासन कार्यालयलाई परिपत्र गरेपछि उपत्यकाका तीन वटै जिल्लामा समय कार्ड शुरु गरिएको हो । धेरै वटा सेवामा समय कार्ड लागू गर्ने जिल्ला भने भक्तपुर भएको छ ।