भक्तपुर, २६ पुस २०७९प्रधानमन्त्री पुष्पकमल दाहाल प्रचण्डले अविश्वसनीय तवरले प्राय सबै सदस्यको विश्वासको मत पाएका छन् । उनले नेमकिपाका प्रेम सुवाल र राष्ट्रिय जनमोर्चाका चित्रबहादुर केसीबाहेक सबैको बिश्वासको मत प्राप्त गरेका हुन् ।
प्रधानमन्त्री प्रचण्डले विश्वासको मत मागेको सम्बन्धी प्रस्तावको पक्षमा प्रतिनिधिसभाको २७५ सदस्यमध्ये २६८ जनाले मतदान गरेका छन् । बैठकमा २७० जना उपस्थित थिए ।
सत्ता साझेदार दल सहित सबै राष्ट्रिय दलको साथै स्वतन्त्र सांसदहरु अमरेशकुमार सिंह, प्रभु साह र योगेन्द्र मण्डलले पनि उनलाई बिश्वासको मत दिएका छन् । विश्वासको मतले आफूलाई गौरवान्वित बनाएको प्रधानमन्त्री प्रचण्डले बताएका छन् । सबै जातजाति, भाषाभाषीको रक्षाका लागि आन्दोलन गरेको स्मरण गर्दै उनले संसदले आफूमाथि बिस्वास गर्दा न्यायको महसुस भएको प्रतिक्रिया दिए ।
उनले आफूलाई प्राप्त मतप्रति न्याय गर्न सकुँला नसकुँला भन्ने चिन्ता भएको भन्दै पूर्ण इमान्दारी साथ् संसदको भावना प्रतिनिधित्व गर्ने प्रतिवद्धता समेत प्रकट गरे ।
