बागमती प्रदेशका मुख्यमन्त्री शालिकराम जमरकट्टेलले नयाँ व्यवस्था बमोजिम सवारी चालक अनुमतिपत्र परीक्षा संचालनको उद्घाटन गरेका छन् । सवारी चालक अनुमतिपत्र परीक्षा संचालन कार्यविधि निर्देशिका, २०७७ बमोजिम परीक्षा संचालनको मुख्यमन्त्री जमरकट्टेलले भक्तपुरबाट उद्घाटन गरेका हुन् ।

राधेराधेस्थित प्रयोगात्मक परीक्षा केन्द्रमा आयोजित उद्घाटन कार्यक्रमलाई सम्बोधन गर्दै मुख्यमन्त्री जमरकट्टेलले परीक्षालाई जटिलताबाट सरलतातर्फ़ लगिएको जानकारी गराएका छन् । नयाँ निर्देशिकाले परीक्षार्थीका साथै परीक्षक कर्मचारीलाई पनि सजिलो र व्यवहारिक गराएको उनले जिकिर गरे ।

मुख्य मन्त्री जमरकट्टेलले जनतालाई कार्यालयले दिने सेवाको आधारमा सरकारप्रति धारणा बन्ने भएकोले जनतालाई अनावश्यक दुख सास्ती नदिन समेत यातायात व्यवस्था कार्यालयलाई निर्देशन दिएका छन् । आफूले अनुगमनको संयन्त्र बनाउने खुलासा गर्दै उनले राम्रो काम गर्नेलाई प्रोत्साहन र नराम्रो गर्नेलाई दण्ड सजायको व्यवस्था हुने चेतावनी दिएका थिए ।

मुख्यमन्त्री जमरकट्टेलले आफ्नो सरकार कर्मचारी मैत्री भएको दावी गर्दै काम गर्ने कर्मचारीलाई प्रोत्साहन भत्ताको ब्यवस्था समेत गरिएको बताए । कुनै दबाब वा अभाव भए सोझै मुख्यमन्त्री कार्यालयलाई जानकारी गराउन आग्रह गर्दै उनले सेवामा दायाबायाँ गरेर सरकारलाई बद्नाम नगर्न निर्देशन दिए ।

उक्त अवसरमा प्रदेशमा प्रमुख सचिव मुकुन्द प्रसाद निरौलाले मुख्य मन्त्रीले उद्घाटन गरेसंगै सवारी चालक अनुमतिपत्र परीक्षा संचालन कार्यविधि निर्देशिका, २०७७ बमोजिम परीक्षा संचालन प्रदेशभर शुरु भएको जानकारी गराए । उनले नयाँ व्यवस्था लागू भए संगै यसका व्यवहारिक अप्ठ्यारा थाहा हुने र निर्देशिका संशोधन गर्दै त्यसलाई सुधार्दै जान सहयोग मिल्ने बताए ।

कार्यक्रममा राधेराधेस्थित यातायात व्यवस्था कार्यालय(लाइसेन्स) का निमित्त कार्यालय प्रमुख शिव निरौलाले नयाँ अभ्यास गर्नुपर्ने भएकोले परीक्षा परीक्षार्थी र कर्मचारी दुबैका लागि चुनौती भएको भनेका छन् । बिस्तारै यसमा बानी परिने र यो परीक्षा संचालन प्रक्रिया सहज हुने उनले विश्वास व्यक्त गरेका छन् ।

नयाँ व्यवस्था अनुसार लिखितमा यातायात व्यवस्था विभागले सार्वजनिक गरी दिएको ५ सय नमूना बस्तुगत प्रश्नबाट २५ प्रश्न सोधिने छ । प्रति प्रश्न ४ अंकभार रहेको यस परीक्षामा उतीर्ण हुन ६० अंक ल्याउनुपर्नेछ । प्रश्न तयार पार्दा विभागले दिएको ५ सय प्रश्न भित्र रही तयार पार्नुपर्नेछ ।

त्यसैगरी प्रयोगात्मक परीक्षामा ७० अंक ल्याउने परीक्षार्थी उतीर्ण हुने व्यवस्था गरिएको छ । परीक्षाका क्रममा कुनै तोकिएको अवस्थामा अनुतीर्ण घोषणा गरिएका बाहेक न्युनत्तम ७० अङ्क प्राप्त गर्ने परीक्षार्थी उतीर्ण हुने निर्देशिकामा उल्लेख रहेको यातायात कार्यालय भक्तपुरका अधिकृत गोबिन्द सिवाकोटीले जनाएका छन् ।