भक्तपुर, १५ फागुन २०७९आफ्नो नगर अध्यक्ष समेत रहेका मध्यपुर थिमि नगरपालिकाका उपप्रमुख विजय कृष्ण श्रेष्ठमाथि आक्रमण भएपछि नेकपा (माओवादी केन्द्र) आक्रोशित भएको छ । पार्टीका जिल्ला इन्चार्ज दिलिप प्रजापति भिष्म र संयोजक सुनिल गोठे बासुले एक बिज्ञप्ति जारी गर्दै दोषी माथि कडा कारवाहीको माग गरेका छन् ।
जनसेवामा रहेका जनप्रतिनिधि माथिको आक्रमण जनता माथिकै आक्रमण भएको नेकपा (माओवादी केन्द्र) भक्तपुर जिल्ला समन्वय समितिले ठहर गरेको छ । पार्टीले यसलाई अक्षम्य अपराध भनेको छ । माओवादी केन्द्रले बिज्ञप्तिमा उच्छ्रिङ्खल तत्वले राजनीतिक दुरासय राखी उप प्रमुख माथि आक्रमण गरेको बताएको छ । ”जुनसुकै आवरण र उक्साहटमा गरिएको भएपनि यस्तो अक्षम्य अपराधमा संलग्न दोषीलाई कानुन बमोजिम कडा कारवाही गर्न पार्टी जोडदार माग गर्दछ ।” बिज्ञप्तिमा भनिएको छ ।
आइतवार बिकास निर्माणमा सहजीकरण गर्न पुगेका उप प्रमुख श्रेष्ठमाथि आक्रमण भएको हो । नेकपा(एमाले) का नगर कमिटी सचिव नै रहेका मथिनपा- ५ का सुमन जोशीको नेतृत्वमा रहेको एक अराजक समूहले उपप्रमुख माथि सुनियोजित आक्रमण गरेको उनको सचिवालयले जनाएको छ । बालकुमारी हात्तिमहाकाल सडक अन्तर्गत वडा नम्बर ४ को दुईपोखरीमा ढुंगा बिछ्याउने कार्यमा अवरोध गर्दै आक्रमण भएको बताइएको छ ।
नगर प्रमुख सुरेन्द्र श्रेष्ठको नेतृत्वमा निर्माणमा सहजीकरण गर्न नगरपालिकाको टोली आइतवार बिहान दुईपोखरी पुगेको थियो । नगरपालिकाले दोषी ठहर गर्दै मथिनपा- ५ का सुमन जोशी र उनको समूहलाई कानुनी कारवाही गर्न प्रहरीलाई पत्राचार समेत गरिसकेको छ ।