भक्तपुर, २२ फागुन २०७९इडेन गार्डेन अंग्रेजी स्कूलले एक विशेष कार्यक्रमका बीच १५ औं वार्षिकोत्सव मनाएको छ । बालकोट स्थित इडेन गार्डेन अंग्रेजी स्कूलले अभिभावक दिवस एवं बिबिध सास्कृतिक कार्यक्रम गरी आइतवार वार्षिकोत्सव सम्पन्न गरेको हो ।
नेशनल प्याब्सनका केन्द्रीय अध्यक्ष पाण्डव हमालको प्रमुख आतिथ्यतामा सम्पन्न कार्यक्रममा नेशनल प्याव्सन भक्तपुरका अध्यक्ष संजय खड्काले बालबालिकाको सिकाइ सुधार्न अभिभावकको भूमिकामाथि प्रकाश पारेका थिए ।
उक्त अवसरमा अनुशासित विद्यार्थी घोषणा गर्दै कक्षा ८ की आयुषा कार्की र कक्षा ६ को आयूष भण्डारीलाई पुरस्कृत गरिएको थियो भने, सरसफाईमा ध्यान दिएर चिटिक्क देखिने गरेका सूची थिङ्ग र आयन थापा मगर पनि पुरस्कृत भएका थिए । वर्षको सर्वोकृष्ट विद्यार्थीमा कक्षा ६ को शुविक्षा थापालाई पुरस्कृत गरिएको थियो ।
कार्यक्रममा शिक्षकहरूको सम्मान र हौसलाका लागि दीर्घ सेवा तथा सर्वोकृष्ट शिक्षकमा आधारभूत तहको शिक्षक विजन श्रेष्ठलाई र दीर्घ सेवा सम्मानबाट पूर्व प्राथमिक तहकी शिक्षक सुमित्रा श्रेष्ठ सम्मानित भएकी थिइन् ।
कार्यक्रममा सबै कक्षाका विद्यार्थीहरुले नृत्य, गीत, नाटक प्रस्तुत गरेर उपस्थित अतिथिका साथै अभिभावकहरुलाई आफ्नो कला कौसल प्रदर्शन गरि मनोरञ्जन प्रदान गरेका थिए ।
विद्यालयका संस्थापक प्रिन्सिपल जयप्रकाश राईले जनाए अनुसार बि.स. २०६८ सालमा ३४ जना विद्यार्थीबाट संचालित विद्यालयमा हाल ८ सय १३ जना विद्यार्थी अध्ययनरत रहेका छन् । प्रविधियुक्त र संस्कार सहितको शिक्षा भन्ने मूल नारा सहित संचालित यो विद्यालय भक्तपुरको एक नमूना विद्यालय बनाउने उद्देश्य सहित अघि बढिरहेको उनले बताएका छन् ।
