भक्तपुर, ८ फागुन २०७९ भक्तपुरको मध्यपुर थिमी १ लौहकिन्थलीस्थित मझेरी क्याफेमा छापामारी प्रहरीले १६ जनालाई समातेको छ । उक्त क्याफेमा जुवातास खेल्नेखेलाउने सूचनाको आधारमा प्रहरीले छापामारी १६ जनालाई समातेको हो ।
बुधवार बेलुकी करिब ६ बजेको समयमा छापामार्दा उनीहरुलाई जुवातास खेलीरहेको अवस्थामा रंगेहात समातेको जिल्ला प्रहरी परिसर भक्तपुरका प्रहरी नायव उपरीक्षक बसन्त पाठकले बताए । उनीहरुको खालबाट १६ बुक तास र ३ लाख बढी नगद बरामद गरिएको बताइएको छ ।
उक्त क्षेत्र जिल्ला प्रहरी वृत्त थिमीको निगरानीमा रहेको भएता पनि परिसरबाट विशेष फोर्स छापा मार्न पुगेको थियो । पक्राउ परेकाहरु मध्ये १३ जना ४० वर्ष भन्दा कम उमेर समूहका रहेका छन् । सिन्धुपाल्चोकको चौतारा सागाचोक गढीका ३९ वर्षीय दिलिप गिरीले संचालन गरेको उक्त क्याफेबाट प्रहरी नियन्त्रणमा पर्नेमा ज्यादातर सिन्धुपाल्चोक र काभ्रेका युवाहरु रहेका छन् । २ जना भने भारतीय नागरिक रहेको समेत खुल्न आएको छ ।
पक्राउ परेकाहरुलाई जिल्ला प्रहरी परिसर भक्तपुरमा राखी आवश्यक अनुसन्धान भैरहेको प्रहरी उपरीक्षक प्रजित केसीले पुष्टि गरे ।