भक्तपुर, ३ जेठ २०८०प्रधानमन्त्री पुष्पकमल दाहाल प्रचण्डले नै स्वास्थ्य तथा जनसंख्या मन्त्रालयको कार्यभार सम्हालेका बेला गरिएको एक राजनीतिक नियुक्ति नेपाली कांग्रेसका स्वास्थ्यमन्त्री आउने वित्तिकै बदर गरिदिएका छन् । डडेल्धुराका लक्ष्मण सिंहले नियुक्ति पाएको एक साता पनि नवित्दै नियुक्ति गुमाउन पुगेका हुन् ।
नेपाल सरकारको मातहतमा सञ्चालन हुने गरि केन्द्रिय स्तरको अस्पतालका रुपमा रहेको डडेल्धुरा अस्पताल विकास समितिको अध्यक्षमा लक्ष्मणलाई नेपाल सरकारले मनोनित गरेको थियो । नेपाल सरकार प्रधानमन्त्री एवं स्वास्थ्य तथा जनसंख्यामन्त्री स्तरीय निर्णयले वैशाख २३ गते उनी अध्यक्ष पदमा मनोनित भएका थिए । अध्यक्षमा नियुक्त भएको तिन वर्ष अर्थात २०८३ वैशाख २२ गते सम्म तिन वर्षको कार्यकाल रह्ने गरी उनलाई नियुक्ति दिइएको थियो ।
त, उनको नियुक्ति एक सातासम्म पनि टिक्न सकेन । कांग्रेसका तर्फबाट स्वास्थ्य तथा जनसंख्या मन्त्रीका रुपमा आएका मोहनबहादुर बस्नेतले उनको नियुक्ति एक सातामै बदर गरिदिए । लक्ष्मणको नियुक्ति बस्नेतले आजकै मितिदेखि बदर गरेका हुन् ।
डडेल्धुरामा रहेको डडेल्धुरा अस्पताल सुदुरपश्चिमकै ठुलो मेडिकल कलेज सञ्चालन गर्ने लक्ष सहित स्वास्थ्य विज्ञान डिनको कार्यालय डडेल्धुरामा स्थापना गरिएको अस्पताल हो ।