सूर्यविनायक नगरपालिका-८ आदर्श बागमती क्लब नजिक काल बहादुर पाख्रीनले आफ्नै घरमा संचालन गरेको आरएन खाजा घरमा जुवातास खेलिरहेको अवस्थामा ३६ वर्षीय पाख्रीनसमेत ५ जनालाई प्रहरीले पक्राउ गरेको छ । विशेष सूचनाको आधारमा प्रहरी वृत्त जगातीबाट खटिएको प्रहरीले उनीहरुलाई पक्राउ गरेको हो ।

उनीहरूलाई तास खेलिरहेको अवस्थामा पक्राउ गरिएको प्रहरीले पुष्टि गरेको छ । नगद ७७ हजार रूपैयाँ सहित पक्राउ परेका पाख्रीनसमेत ५ जनालाई वृत्तमा राखी अनुसन्धान भैरहेको वृत्त प्रमुख राजकुमार श्रेष्ठले जनाएका छन् ।

यसैगरी चाँगुनारायण नगरपालिका-६ नगरकोट फेदीस्थित अनुग्रह गेष्ट हाउसमा पनि जुवातास खेलिरहेको अवस्थामा मानिसहरु पक्राउ परेका प्रहरीको भनाइ छ । संचालक २९ वर्षीय बलराम सुवालसहित ४ जनालाई प्रहरीले पक्राउ गरेको हो ।

विशेष सूचनाको आधारमा प्रहरी प्रभाग खरिपाटीबाट खटिएको प्रहरीले उनीहरूलाई नगद १ लाख ७४ हजार १ सय ३० रूपैयाँ र ३ बुक ताससहित फेला पारी कारवाही प्रक्रिया अघि बढाएको बताइएको छ ।