भक्तपुर, २२ जेठ २०८०नेपाल प्रहरीका ४६ जना प्रहरी निरीक्षक (इन्स्पेक्टर) प्रहरी नायब उपरीक्षक (डिएसपी)का लागि बढुवा सिफारिस भएका छन् । बढुवा सिफारिस हुनेमा जिल्ला प्रहरी परिसर भक्तपुरकी इन्स्पेक्टर लक्ष्मी खनाल पनि परेकी छन् ।
सोमबार बसेको बढुवा समितिको बैठकले बढुवाका लागि सिफारिस गरेको हो । प्रहरी नियमावली, २०७१ (संशोधनसहित) को नियम २७ को उप–नियम (४) अनुसार रिक्त दरवन्दीमा बढुवा सिफारिस गरिएको प्रहरी प्रधान कार्यालयले जनाएको छ ।
बढुवा सिफारिसको पहिलो नम्बरमा रञ्जन अवा,दोस्रोमा कमल वेल्वासे र तेस्रोमा यमकुमार श्रेष्ठ रहेका छन् । ४६ जना बढुवाको लागि सिफारिस हुँदा ४६ औं नम्बरमा अटाउदै जिल्ला प्रहरी परिसर भक्तपुरकी इन्स्पेक्टर लक्ष्मी खनाल सिफारिसमा पर्न सफल भएकी हुन् ।
राजनीति शास्त्र र सार्वजनिक प्रशासनमा स्नातकोत्तर गरेकी खनालले कानुन विषयमा समेत स्नातक गरेकी छन् । १० वर्ष अघि इन्स्पेक्टर नियुक्त उनी राष्ट्रपतिबाट नेपाल प्रताप सुभुषणले विभूषित भएकी छन् भने गण्डकी प्रदेश सरकारले उनलाई आव २०७८/७९ मा उत्कृष्ट प्रहरीको रुपमा सम्मानित समेत गरेको छ । भक्तपुरमा पनि उनले प्रहरी सेवामा राम्रो कार्यसम्पादनको रेकर्ड राखेकी छन् ।