ऊर्जा, जलस्रोत तथा सिंचाइ मन्त्री शक्तिबहादुर बस्नेत संयुक्त अरव इमिरेट्सको अबुधावी पुगेका छन् । अन्तर्राष्ट्रिय सौर्य गठबन्धन (आई.एस.ए.) क्षेत्रीय समितिको पाँचौं बैठकमा सहभागी हुन नेपाली टोलीको प्रतिनिधित्व गर्दै उनी अबुधावी पुगेका हुन् ।

टोली ३ सदस्यीय रहेको मन्त्रीका स्वकीय सचिव देव बोहराले बताए । बुधबारसम्म बैठक चल्ने र मन्त्री बस्नेतले नेपालमा सौर्य ऊर्जा प्रविधि बिकास र ऊर्जा पहुँच वृद्धिका योजना प्रस्तुत गर्ने बताइएको छ । नेपालमा नवीकरणीय ऊर्जा क्षेत्रको विकासका लागि अन्तर्राष्ट्रिय क्षेत्रको लगानी एवं आर्थिक तथा प्राविधिक सहयोग प्राप्त गर्न यसबाट मद्दत पुग्ने विश्वास व्यक्त गरिएको छ ।

बैठकमा आई.एस.ए. का सदस्य राष्ट्रहरु, एसिया-प्रशान्त क्षेत्रका देशहरू मध्ये सम्भाव्य सदस्य राष्ट्रहरु, साझेदार संगठनहरु लगायतको सहभागिता छ ।