भक्तपुर, २६ साउन २०८०इन्टरपोलबाट ‘रेड नोटिस’ जारी गरी एक प्रतिवादीलाई मलेशियाबाट नेपाल फिर्ता ल्याइएको छ । म्याग्दी जिल्लाको साविकको अर्मन गाविस–२ ठेगाना भएका २७ वर्षीय प्रकाश विक लाई मलेसियाबाट नेपाल फिर्ता ल्याइएको हो ।
पीडितसँग चिनजान गरी प्रेम सम्बन्धमा रहेको बखत विभिन्न बहानामा नग्न हुन बाध्य बनाइ रेकर्ड गरेका नग्न भिडियो, फोटो सामाजिक सञ्जाल फेसबुकमा अपलोड गर्ने, पीडितको आफन्तलाई पठाइदिने तथा पीडितले आफ्नो फेसबुक एकाउन्ट डिएक्टिभ गरेपछि निजको नाममा ‘फेक एकाउन्ट’ बनाइ ती सामग्री पोर्न साइटमा अपलोड गरी चरित्रहत्या गरेकोसम्बन्धी साइबर अपराध मुद्दामा उनलाई अदालतले पक्राउ आदेश दिएपनि उनी प्रौ पर्न सकेका थिएनन् ।
जिल्ला अदालत काठमाडौँबाट पक्राउ अनुमति जारी भएका विकलाई प्रहरी प्रधान कार्यालय इन्टरपोल शाखाले इन्टरपोल मलेशियासँग समन्वयगरी सोमबार नेपाल ल्याई त्रिभुवन अन्तर्राष्ट्रिय विमानस्थलबाट नियन्त्रणमा लिएको प्रहरी प्रवक्ता कुवेर कडायतले जानकारी दिए ।
विक वैदेशिक रोजगारीको सिलसिलामा मलेसियामा रहेको साइबर ब्यूरो भोटाहिटीले जानकारी दिए बमोजिम विकविरुद्ध अन्तर्राष्ट्रियस्तरमा खोजतलासको लागि नेपाल प्रहरी प्रधान कार्यालय इन्टरपोल शाखाको अनुरोधमा विसं २०७८ माघ २४ गते इन्टरपोल महासचिवालयबाट‘रेड नोटिस’ जारी गरिएको थियो ।