पूर्व उद्योग मन्त्री एवं नेकपा एमालेका पोलिटब्युरो सदस्य महेश बस्नेतले मेडिकल व्यवसायी दुर्गा प्रसाईलाई कारवाही गर्नुपर्ने बताएका छन् । एमालेका पूर्व केन्द्रीय सदस्य समेत रहेका व्यवसायी प्रसाईले मारवाडी समुदायप्रति सद्भाव भड्काउने काम गरिरहेकाले उनलाई कारवाही गर्नुपर्ने एमाले नेता बस्नेतले बताएका हुन् ।

दुर्गा प्रसाईले अराजक अभियानको नेतृत्व गरेर मारवाडी व्यवसायीलाई मानमर्दन गरेका र घृणाको कारोवार गरी सद्भाव भड्काउन खोजेका नेता बस्नेतको दावी छ । मारवाडीहरुले अर्थतन्त्र तहसनहस पारेको आरोप लगाई दशैँ लगत्तै १६ मारवाडीलाई देश बाट लखेट्ने प्रसाइको अभिव्यक्ति सद्भाव भड्काउने खालको भएकोले उनलाई कारवाही गर्नुपर्ने पूर्वमन्त्री बस्नेतले माग गरेका छन् ।

व्यवसायी दुर्गा प्रसाईले बर्माबाट भागेर नेपाल पसेका मारवाडीहरुको हातमा देशको अर्थतन्त्र पुगेको र उनीहरुले देशको अर्थतन्त्रलाई खोक्रो बनाएको आरोप लगाउदै दशैं लगत्तै केही मारवाडीलाई लखेट्ने अभियान संचालन गर्ने एक राष्ट्रिय टेलिभिजन अन्तर्वार्तामा सार्वजनिक गरेका छन् ।

बर्मा सरकारले आर्थिक अनियमतिता गरेको आरोपमा देश निकाला गरेपछि भागेर नेपाल आएका मारवाडी सोहनलाल गोल्यानसहितका १६ परिवारले देशको अर्थतन्त्रमा कब्जा जमाई तहसनहस पारेका प्रसाईको आरोप छ । प्रसाईका अनुसार बर्माबाट लेखेटिएपछि नेपाल पसेका मारवाडीहरुमा मोती दुगड, नन्दु मुन्दडा, राजु मुन्दडा, पवन सरिया, सोहनलाल गोल्यान, पवन गोल्यान र बासु गोल्यानहरु रहेका छन् ।