भक्तपुर, १० बैशाख २०८१चाँगुनारायण नगरपालिकाले आगलागी सुरक्षा सम्बन्धि अभिमुखिकरण तथा अग्नी नियन्त्रण अभ्यास गराएको छ । आगलागीको सम्भावित प्रकोपबाट बच्न आवश्यक उपायबारे अभिमुखिकरण तथा अग्नी नियन्त्रण अभ्यास गराइएको हो ।
वडा नम्बर १ देखि ६ सम्म सो कार्यक्रम सम्पन्न गरिसकिएको चाँगुनारायण नगरपालिकाका विपद् व्यवस्थापन इकाई प्रमुख दिनेश थापाले जानकारी दिएका छन् । वडास्तरीय विपद व्यवस्थापन समितिको समन्वयमा बैशाख ४ बाट शुरु सो कार्यक्रम बुधवार सम्ममा सबै वडामा सम्पन्न हुने उनको भनाइ छ ।
कार्यक्रममा समुदायस्तरमा आगलागी सुरक्षा सम्बन्धि जनचेतना जागृत गर्ने काम भएको प्रमुख प्रशासकीय अधिकृत चुरामणी पन्थीले प्रष्ट पारेका छन् ।
कार्यक्रममा गृहिणीहरु सहभागी भएका र घरमा खाना पकाउन प्रयोग हुने ग्यास सिलिन्डर चुहावट भै हुनसक्ने आगलागी रोक्ने तरिका सिकेका वडा नम्बर १ का वडाध्यक्ष सोम प्रधानले बताएका छन् । वडा नं ४ का वडाअध्यक्ष रोज बहादुर तामाङले सुख्खा मौसममा दिनानुदिन बढिरहेको आगलागीका घटना नियन्त्रणमा समुदायको भूमिका हुने भन्दै अभिमुखीकरण लाभदायी रहेको बिश्वास व्यक्त गरे ।
स्थानीयलाई अभिमुखिकरण तथा अभ्यास प्रदर्शनमा सहभागी गराइएको र आगलागी भएको अवस्थामा स्थानीय साधन श्रोतको प्रयोग गरी आगलागी नियन्त्रण गर्ने उपायका बारेमा अवगत गराइएको नगर प्रमुख जीवन खत्रीले जनाएका छन् । अभ्यास गराइएको कारण स्थानीयमा आत्मबल मिलेको उनले बताए । यसले समुदायमै अग्नि नियन्त्रक उत्पादन हुने प्रमुख खत्रीले बिश्वास व्यक्त गरेका छन्
राजकुमार लम्साल, सञ्जय अवाल र अनुप मल्लले सहजिकरण तथा अभ्यास गराउने उक्त कार्यक्रमका लागि आर्थिक सहयोग भने सामाजिक संस्थाहरु आइसेट नेपाल तथा डिसिए नेपालको रहेको बताइएको छ ।