सानोठिमी, २८ भदौ २०८१शिक्षा, विज्ञान तथा प्रविधि मन्त्री विद्या भट्टराईको अभिव्यक्तिप्रति कर्मचारी संगठनले आपत्ती जनाएको छ । मन्त्री भट्टराईले पदकै गरिमा गिराएको भन्दै प्राविधिक शिक्षा तथा व्यवसायिक तालीम परिषद (सीटीईभीटी) को नेपाल राष्ट्रिय कर्मचारी संगठनले विज्ञप्ती जारी गरी बिरोध जनाएको हो ।
संगठनका कार्यवाहक अध्यक्ष मेनुका घिमिरे र महासचिव शिवानन्द मिश्रले जारी गरेको बिज्ञप्तीमा सीटीईभीटीको अध्यक्ष समेत रहेकी मन्त्री भट्टराईले कर्मचारीलाई लान्छना लगाउनु लज्जास्पद भएको भनिएको छ । मन्त्री भट्टराईले आफू नै अध्यक्ष रहेको र आफ्नै मातहत रहेको संस्थाको बेइज्जत गर्नेगरी सामाजिक संजालमा अभिव्यक्ति दिएको संगठनको भनाइ छ ।
सीटीईभीटीका पदाधिकारी र कर्मचारीले आर्थिक चलखेल गरेका भए वा, सो सम्बन्धी सूचना प्राप्त गरेको भए सोझै कारवाही गर्नसक्ने सामर्थ्य मन्त्रीमा रहेको भएपनि सामाजिक संजालमा भ्रामक अभिव्यक्ति दिएर मन्त्रीले संस्था र आफ्नै पनि गरिमा गिराएको संगठनको आरोप छ ।
अपारदर्शी ढंगबाट दर्ता क्रम संख्या मिचेर दिएको निजी शैक्षिक संस्थाको मनसाय पत्रलाई स्वीकृत गरी सदर गर्ने र मन्त्रीको हैसियतले ती शैक्षिक संस्थालाई सम्बन्धन प्रदान पनि गर्ने मन्त्री भट्टराईलाई सामाजिक संजालमा स्टन्टबाजी नगर्न संगठनले सुझाव दिएको छ । साथै, संगठनले सो बैठकमा हस्ताक्षर गर्ने सबैको सम्पत्ती छानविन गर्न समेत माग गरेको छ ।
शुक्रवार मन्त्री भट्टराईले सामाजिक संजाल फेसबुकमा स्टाटस लेख्दै सीटीईभीटी संग सम्बन्धित सम्बन्धन, परीक्षा, प्रमाणपत्र लगायतका काममा कार्यालय प्रमुख, निर्देशक र कर्मचारीले अनावश्यक दबाब दिएको, काममा ढिलाई गरेको र आर्थिक लेनदेन समेत गरेको गुनासो प्राप्त भएको भनेकी छन् । साथै, सो विषयमा स-प्रमाण जानकारी गराउन पनि उनले आग्रह गरेकी छन् ।
अनुसन्धान र कारवाहीको अधिकार प्राप्त मन्त्रीले सामाजिक संजालमा स्टन्टबाजी गर्दा कर्मचारीको मनोबल र परिषदको गरिमा गिरेको कर्मचारी संगठनले ठहर गरेको छ ।