भक्तपुर, ११ असोज २०८१भक्तपुरकी प्रमुख जिल्ला अधिकारी रोशनीकुमारी श्रेष्ठले आइतबार सम्म बिपदको जोखिम भएकोले उच्च सतर्कता अपनाउन आग्रह गरेकी छन् । मौसम बिज्ञान बिभागले भारी मनसुनी वर्षा हुने प्रक्षेपण गरेकाले उच्च सतर्कता अपनाउन उनले आग्रह गरेकी हुन् ।
जिल्लास्थित हनुमन्ते र मनोहरा लगायत खोला र खोल्साहरुमा पानीको बहाव बढ्ने र बाढीको उच्च जोखिम रहेकाले सतर्क रहन तथा रातको समयमा खोला,खोल्सा र पोखरी किनारको यात्रा नगर्न सिडिओ श्रेष्ठले सुझाव समेत दिएकी छन् ।
त्यस्तै, चाँगुनारायण नगरपालिका लगायत सूर्यविनायक र मध्यपुर थिमिका भिरालो क्षेत्रमा पहिरोको जोखिम बढ्नसक्ने बताउदै सतर्क रहन आग्रह गरिन । उच्च जोखिमयुक्त भिरालो क्षेत्रमा नबस्न र सो स्थानमा घर भए वर्षाले माटो बगाउन नदिन प्लास्टिकले छोप्ने ब्यवस्थाका लागि उनले आग्रह गरेकी छन् ।
जिल्लास्थित सुरक्षा निकायलाई सम्भावित प्रकोपको प्रतिकार्यका लागि अलर्ट गराइएको जानकारी दिदै सिडिओ श्रेष्ठले उच्च जोखिम रहेको क्षेत्र पहिचान गरी निगरानी र उद्धारको प्रवन्ध मिलाइएको बताइन् ।
उच्च मनसुनी वर्षाको प्रक्षेपणले गर्दा देशैभर उच्च सावधानी अपनाउन गृह मन्त्रालयले पनि आग्रह गरेको छ । राष्ट्रिय विपद् जोखिम न्यूनीकरण तथा व्यवस्थापन प्राधिकरणले शुक्रबार र शनिबार राति ५६ जिल्लामा रात्रिबस चलाउन समेत रोक लगाएको छ । विपदका घटना बढ्न सक्ने भन्दै मनसुन पूर्वतयारी तथा प्रतिकार्य कमाण्ड पोष्टले रातको समयमा असोज ११ आज र १२ गते भोलि रात्रिकालीन बस चलाउन नदिने निर्णय गरेको हो।