सरकारलाई खबरदारी गर्न शनिबार हजारौं भक्तपुरबासी काठमाडौं जाने प्रमुख प्रतिपक्षी दल नेकपा(माओवादी केन्द्र)का जिल्ला इन्चार्ज दिलिप प्रजापति भिष्मले जनाएका छन् । जिल्ला पार्टीको नेतृत्वमा हजारौं सर्वसाधारण सरकारलाई खबरदारी गर्न काठमाडौं जाने उनको भनाइ छ ।

नेकपा (माओवादी केन्द्र)ले कार्तिक १० गते शनिबार काठमाडौंमा जनप्रदर्शन र खबरदारी सभा गर्ने तय भएको भन्दै उनले भक्तपुर बाट ब्यापक जनसहभागिता रहने विश्वास व्यक्त गरे । सरकारका गलत कामको प्रतिरोध र गर्नुपर्ने कामबारे ध्यानाकर्षण गराउन पार्टीले कार्यक्रम निर्धारण गरेको उनले बताएका छन् ।

विपत् व्यवस्थापनमा सरकार गैरजिम्मेवार र योजनाविहिन भएको कारण बाढीपहिरो पिडित जनताको खोजी, राहत, उपचार, पुनर्स्थापना र पुनर्निर्माणको क्षेत्रमा समस्या भएको त्यसैगरी आफ्नो पार्टी नेतृत्वको सरकारले शुरु गरेको सुशासनको अभियानलाई कमजोर बनाउन षड्यन्त्र र भ्रष्टाचारजन्य गतिबिधि भैरहेकोले खबरदारी सभामा सहभागी हुनुको बिकल्प नभएको उनको भनाइ छ ।

माओवादी केन्द्रका केन्द्रीय सदस्य समेत रहेका जिल्ला इन्चार्ज दिलिप प्रजापति भिष्मको नेतृत्वमा बुधवार बिहान तयारी बैठक समेत सम्पन्न भएको छ । उनले जिल्लाका सबै नगर अध्यक्ष र जनवर्गीय संगठनका प्रमुखहरु बोलाई खबरदारीसभाको तयारीमा जुट्न निर्देशन दिएका छन् ।

बैठकमा बागमती प्रदेश सांसद एवं केन्द्रीय सदस्य देवेन्द्र श्रेष्ठले केपी ओली नेतृत्वको सरकारले सय दिन काम गर्दा दलाल, बिचौलिया तथा भ्रष्टाचारीहरुको संरक्षण गर्ने र जनतालाई निराश बनाउने मात्र काम भएको भन्दै सरकारलाई सहि मार्गमा ल्याउन खबरदारी सभालाई सशक्त बनाउन आग्रह गरे ।

त्यस्तै, अर्का केन्द्रीय सदस्य डिपी ढकालले उद्योगहरुको बक्यौता उठाउन खोज्दा विद्युत प्राधिकरणका कार्यकारी निर्देशकलाई हटाउन खोज्ने, पार्टीगत स्वार्थ साध्न उपसभामुख हटाउन खोज्ने र बिचौलिया र दलालको पक्षमा उभिएको सरकारले कुशासन, महङ्गी बढाउनुका साथै अर्थतन्त्र धरासायी बनाएको बताए । प्रधानमन्त्री स्वयंले आफ्नो दलको पार्टी कार्यालयका लागि विवादित व्यवसायीबाट जग्गा दान लिनेसम्मको अवस्थाले यो सरकार भ्रष्टाचारको नाङ्गो नाच नाचिरहेको आरोप लगाउदै उनले सरकारलाई तह लगाउनपर्ने आवश्यकता औल्याए ।

बैठकमा केन्द्रीय सदस्यहरु प्रतिमा श्रेष्ठ, इन्दिरा अधिकारी त्यसैगरी प्रदेश सदस्यहरु युवराज आचार्य, डिपी थपलिया आक्रोश, प्रेम लामा तथा प्रदेश सांसदसमेत रहेकी भुवनकेशरी श्रेष्ठ भावनाको उपस्थिति रहेको थियो ।

बैठकमा नगर अध्यक्ष र जनवर्गीय संगठनका प्रमुखहरुले रिपोर्टिंग गरेका जिल्ला सचिव जीवन तजले जानकारी दिए । सचिव तजले दिएको जानकारी अनुसार जनप्रदर्शन र खबरदारी सभामा प्रत्येक नगर समितिबाट ५ सयको संख्यामा गरी कम्तिमा २ हजार जना कार्यकर्ता सहभागी हुनेछन भने जनवर्गीय संगठनका तर्फबाट समेत ब्यापक सहभागिता हुनेछ ।

भक्तपुरमा माओवादी केन्द्रको ३ हजार बढी पार्टी सदस्य रहेका छन् । पार्टी सदस्यको अलावा आम सर्वसाधारण समेत सरकारलाई खबरदारी गर्न सडकमा ओर्लने अपेक्षा गरिएको जिल्ला संयोजक सुनिल बासुले बताए ।