भक्तपुर, २९ कार्तिक २०८१भक्तपुरमा एक जेष्ठ नागरिक महिला दुबै खुट्टा बाँधिएको अवस्थामा मृत फेला परेकी छन् । बुधवार साँझ सवा ५ बजेको समयमा उनी आफ्नै घरमा मृत फेला परेकी हुन् ।
मृतक भक्तपुर नगरपालिका वडा नं. ३ दरवारस्क्वायरस्थित इछुगल्लीमा बस्ने ९४ वर्षीया विष्णु कुमारी त्वयना भएको वडाध्यक्ष राजकुमार गोराले जानकारी गराए । आफ्नै घरको चौथो तल्लामा एक्लै बस्दै आएकी त्वयना आफु सुत्ने कोठामा कपडाले दुबै खुट्टा एकै ठाँउमा बाँधिएको अवस्थामा मृत फेला परेकी उनको भनाइ छ ।
वडाध्यक्ष गोराका अनुसार मृतकका ४ भाइ छोराहरू भएपनि उनी एक्लै बस्दै आएकी थिइन् । उनका छोराहरु भने सूर्यविनायक सरेका थिए । बुधबार दिनभर सासुलाई घर बाहिर नदेखेपछि नजिकै क्युरियो पसल सञ्चालन गर्दै आएकी उनकी कान्छी बुहारी हेर्न जाँदा उनलाई खुट्टा बाँधिएको अवस्थामा मृत फेला पारेको स्थानीयले बताएका छन् ।
प्रकृति हेर्दा चाेरी प्रयासको लागि बाँधिएको र मुखमा कपडा कोचिएको जस्ताे देखिएपनि चाेरी नभएको हुँदा घटना शङ्कास्पद भएको स्थानीयको भनाइ छ ।
शवलाई प्रारम्भिक अनुसन्धान र मुचुल्का उठाइ पोस्ट्मार्टमका लागि दुवाकोटस्थित केएमसी अस्पताल पुर्याइएको छ । पोस्टमार्टमको रिपोर्ट नआई हत्या भनिहाल्ने अवस्था नरहेको जिल्ला प्रहरी परिसर भक्तपुरले जनाएको छ ।
घटनाको सम्बन्धमा थप अनुसन्धान कार्य भइरहेको डिएसपी ढुन्डिराज नेउपानेले जानकारी दिएका छन् । डेरामा बस्ने एक जनालाई अनुसन्धानका लागि पक्राउ गरिएको छ ।