भक्तपुर । नेपाल भूतपूर्व सैनिक सङ्घको अध्यक्षमा सुदर्शन दाहाल निर्विरोध निर्वाचित भएका छन् ।

भक्तपुरमा आयोजित नेपाल भूतपूर्व सैनिक सङ्घ, भक्तपुरको प्रथम अधिवेशनबाट अध्यक्षमा दाहाल सहित १७ जना कार्यसमिति तथा प्रदेश महाधिवेशन प्रतिनिधि र केन्द्रीय महाधिवेशन प्रतिनिधि निर्विरोध निर्वाचित भएका हुन् ।

अध्यक्षमा दाहाल निर्वाचित हुँदा उपाध्यक्षमा नवराज श्रेष्ठ र रवीन्द्र खड्का,सचिवमा सुरज खड्का, सह सचिवमा पवन बस्नेत र कोषाध्यक्षमा यज्ञ राज भट्ट निर्वचित भएका छन् ।

त्यसैगरी सदस्यहरूमा मनोज बुढाथोकी, पूर्ण बहादुर भुट्ट, लक्ष्मण थापा, मखन सिंह लामा, दिने खड्का, विनोद साख, तीर्थमान लामा, विजेश कार्की, रामेश्वर साख, श्याम सुन्दर श्रेष्ठ र सोनाम लामा चयन भएका बताइएको छ ।

बागमती प्रदेश महाधिवेशन प्रतिनिधिमा मखनसिंह लामा, लक्ष्मण थापा, नवराज श्रेष्ठ, दिनेश खड्का, माधव वन र राजकुमार बाटा निर्विरोध निर्वाचित हुँदा  केन्द्रीय महाधिवेशन प्रतिनिधिमा भने गोकर्ण पुरी, तीर्थमान तामाङ, पवन खत्री, लक्ष्मण भुट्ट श्रेष्ठ चयन भएका छन् ।

अधिवेशनको उद्घाटन नेपाली काँग्रेसका भक्तपुर जिल्ला सभापति एवं प्रतिनिधिसभा सदस्य दुर्लभ थापाले गरेका थिए । कार्यक्रम उद्घाटन गर्दै उनले सैनिक कहिले पनि पूर्व नहुने बताए । सेनाले सेवा निबृत्त भएपछि पनि देश र जनताको सेवामा तल्लीन हुनुपर्ने उनको भनाइ छ ।

“सङ्गठनमा रहँदा इमानदार रहनुभयो । अव देश बनाउने जिम्मा पनि इमानदारी पूर्वक पूरा गर्नुपर्नेछ ।” उनले भने ।  सेनाको ताकत भनेकै देशभक्ति भएको भन्दै उनले देश बिकासमा अवरोध गर्नेलाई पूर्व सेनाले रोक्नपर्नेमा जोड दिए । उनले भूतपूर्व सेनाले शान्ति सुरक्षा र सुशासनमा समेत योगदान गर्नुपर्ने उल्लेख गरे ।

कार्यक्रममा बागमती प्रदेश सभा सदस्य सुरेश श्रेष्ठ, बागमती प्रदेश सरकारका पूर्व भौतिक पूर्वाधार मन्त्री कृष्णलाल भँडेल लगायतको आतिथ्यता रहेको थियो ।