भक्तपुर, २८ माघ २०८१भक्तपुरबाट तीर्थयात्री बोकेर निस्केको बस नौबिसेमा दुर्घटनामा परेको छ । दुर्घटनामा परी एकजनाको घटनास्थलमै ज्यान गएको छ भने २ दर्जन बढी घाइते भएका छन् ।
भक्तपुरबाट २९ जनासहित देवघाट तिर्थयात्रामा गएको बस गएराती करिब १० बजेको समयमा धादिङ जिल्लाको नौबिसेमा दुर्घटना भएको हो । गुड्दागुड्दैको बस पत्ता भाँचिएर बीच सडकमै पछाडिपट्टि पल्टिएको थियो ।
दुर्घटनामा परी ज्यान गुमाउनेमा दोलखाको तामाकोशी गाउँपालिका वडा नं. १ निवासी पार्वती काफ्ले रहेकी आफन्तले पुष्टि गरेका छन् । करिब ४८ वर्षीया पार्वती भक्तपुरका चर्चित सामाजिक अभियन्ता नवराज काफ्लेकी भाउजू हुन् । दुर्घटनामा काफ्ले परिवारका मात्रै १८ जना घाइते भएका छन् ।
घाइतेमध्ये ३ को अवस्था गम्भीर रहेको छ । उनीहरूसहित १७ घाइतेहरु वीर अस्पताल, ट्रमा सेन्टर, नेपाल प्रहरी अस्पताल र बाँसबारी स्थित न्युरो अस्पतालमा उपचाररत छन् । ११ जना भने सामान्य उपचार पश्चात् घर फर्किएका बताइएको छ ।
सो बस आइतबार साँझ करिब ७ बजे सूर्यविनायक-५ कटुन्जेबाट देवघाटका लागि छुटेको थियो । स्थानीय सूर्यप्रसाद काफ्लेले घरमा सप्ताह सम्पन्न गरेका र सोही सप्ताहको पाती सेलाउन र महायज्ञमा सहभागी हुन देवघाट दर्शनका लागि जानेक्रममा यात्रीहरु दुर्घटनामा परेका वडाध्यक्ष राजकुमार जोशीले जानकारी दिए ।