स्थानीय तहको संस्थागत क्षमता स्वमूल्यांकन (लिजा)मा चाँगुनारायण नगरपालिका भक्तपुर जिल्लामा सर्वोत्कृष्ट भएको छ ।

जिल्लाका चार पालिकामध्ये चाँगुनारायणले १०० पूर्णाङ्कमा ९२ दशमलव ५ अंक प्राप्त गरी जिल्ला प्रथम भएको प्रशासकीय अधिकृत सुरज पौडेलले पुष्टि गरे । जिल्ला प्रथम भएको चाँगुनारायण उपत्यकाका १८ पालिका मध्ये भने तेस्रो भएको उनले बताएका छन् ।

त्यसैगरी मध्यपुर थिमि नगरपालिका ९१ अंकसहित जिल्ला दोस्रो हुँदा सूर्यविनायक नगरपालिका ९०.५ अंक प्राप्त गर्दै तेस्रो र भक्तपुर नगरपालिकाले ८९ अंक प्राप्त गर्दै चौंथो बनेको बताइएको छ ।

देशभरका ७ सय ५३ वटै स्थानीय तहमा जवाफदेहिता, पारदर्शिता र प्रतिस्पर्धा प्रवर्द्धन गर्दै सुशासन कायम गर्ने उद्देश्यले स्थानीय तह स्वमूल्यांकन प्रणाली (लिजा) कार्यान्वयनमा ल्याइएको हो । संघीय मामिला तथा सामान्य प्रशासन मन्त्रालयले स्थानीय तहको स्व-मूल्यांकन गर्न मिल्नेगरी यो प्रणाली बिकास गरेको छ र प्रत्येक वर्ष विषय अनुसार प्राप्त नम्बरका आधारमा नतिजा सार्वजनिक गर्दै आएको छ ।

लिजाले पालिकाको अवस्था थाहा पाउन र सुधार गर्न मद्दत मिल्ने बिश्वास गरिएपनि लिजामा कम अंक प्राप्त गर्ने स्थानीय सरकारको कार्यसम्पादनस्तर धेरै अंक प्राप्त गर्नेको भन्दा राम्रो हुने गरेको विरोधाभास अवस्था पनि देखिन्छ । लिजा भर्न प्राविधिक ज्ञान चाहिने भएकोले पनि नतिजा प्रभावित हुने गरेको छ ।