बनेपा, २२ साउन २०८२काभ्रेपलाञ्चोक । काभ्रेपलाञ्चोकको बनेपा नगरपालिका–८ सिनागालमा अवस्थित ‘अग्नी बचत तथा ऋण सहकारी संस्था लिमिटेड’सँग सम्बन्धित मुद्दामा जिल्ला प्रहरी कार्यालय धुलिखेलले ७ दिने सार्वजनिक सूचना जारी गरेको छ।
जारी सूचनामा उल्लेख गरिएअनुसार, सहकारीका बचतकर्ताहरूले विभिन्न मितिमा नगद रकम जम्मा गरेपश्चात संस्थाका पदाधिकारीहरूमाथि ठगी अभियोगमा अनुसन्धान अगाडि बढाइएको छ। यस सम्बन्धमा जाहेरी समेत दर्ता भइसकेको र केही प्रतिवादीहरू फरार रहेको प्रहरीले जनाएको छ।
प्रहरीले पीडित बचतकर्ताहरूलाई आफ्नो दावी प्रमाणित गर्नको लागि पासबुक, भौचर, मौज्दात प्रमाण लगायतका कागजातसहित ७ दिनभित्र जिल्ला प्रहरी कार्यालय, काभ्रेपलाञ्चोकको आर्थिक अपराध अनुसन्धान शाखामा सम्पर्क गर्न अनुरोध गरेको छ।
सूचना अधिकृत तथा प्रहरी नायव उपरीक्षक मिन बहादुर घलेले हस्ताक्षरित सूचनामा पीडित सबैलाई आवश्यक प्रमाणसहित सम्पर्क राख्न अनुरोध गरिएको हो ।