सिन्धुली । अवैध रुपमा गाई-गोरुकोे तस्करी बढ्दै जाँदा स्थानीय चिन्तित बनेका छन् । सदरमुकाम सिन्धुलीमाडी, कमलाखोच तथा मरिण क्षेत्रका विभिन्न स्थानबाट गाईगोरुकोे अवैध तस्करी र व्यापार हुने गरेको हो ।
तस्करहरुले सिन्धुलीसहित रामेछाप, दोलखा, ओखलढुंगा, खोटाङलगायतका जिल्लाका ग्रामीण वस्तीबाट ल्याईएका बुढा गाई, गोरु सिन्धुलीलाई ट्रान्जिट प्वाईन्ट बनाएर भारतीय बजारमा पु¥याउँदै आएका छन् ।
वार्षिक रुपमा ८७ हजार भन्दा बढीको संख्यामा गाई तथा गोरु तस्करी हुँदै आएकोे छ । एउटा बुढो गाईको २ हजारदेखि ५ हजार रुपैयाँसम्ममा बिक्री हुँदै आएको छ । रातिको समयमा सिन्धुली हुँदै तराईतर्फ गाईगोरु तस्करी हुने गरेको स्थानीय बताउँछन् । यस्ता गाईगोरु भारतमा पुर्याउने गरिएको छ ।
नेपालमा बुढा भएका गाइगोरु बिक्री गर्न पाइँदैन । तर तस्करहरुले प्रशासनको आँखा छलेर यस्ता गाईगोरु संकलन गरी मासुका लागि भारतीय बजारमा पुर्याउने गरेको बताइएको छ । स्थानीयबासीले भने तस्करी नियन्त्रण गर्न प्रशासनले चासो नदेखाएको आरोप लगाएका छन् ।