भक्तपुर, २ माघ काँग्रेस नेतृत्वको सरकारले आज प्रदेशको केन्द्र तोक्ने तयारी गरेको छ । प्रदेश नम्बर ३ को केन्द्रको रुपमा चर्चामा रहेको भक्तपुरको सट्टा ललितपुरलाई अगाडी सार्न लागिएको छ ।
केन्द्रको बिषयमा नेताहरुको आ -आफ्नै अडान रहेको र केन्द्र निर्धारण बिबादरहित नहुने देखेपछि सरकारले मध्यमार्गी धार अपनाउन लागेको हो । प्रदेश राजधानी प्रदेश सभाले तोक्ने बिषय भएको र यसमा बिबादमा नपर्ने प्रधान मंत्री शेर बहादुर देउवाको सोच अनुरुप उच्च अदालत भएका शहरहरुलाई नै अस्थायी केन्द्रको रुपमा अघि सारिएको श्रोतले बताएको छ ।
”उच्च अदालत राख्ने निर्णय गरेको ठाउमै प्रदेशको अस्थायी केन्द्र तोकिने तयारी छ ।” श्रोतले भन्यो । सरकारले प्रदेश नं १ को मोरङ, प्रदेश २ नं को धनुषा, प्रदेश नं ३ को ललितपुर, प्रदेश नं ४ को कास्की, प्रदेश नं ५ को दाङ, प्रदेश नं ६ को सुर्खेत र प्रदेश नं ७ को दीपालयमा उच्च अदालत राख्ने निर्णय गरेबमोजिम नै प्रदेशको अस्थायी मुकाम घोषणा गर्ने बताइएको छ ।
निर्वाचन आयोगको ताकेता पछि सरकार अस्थाई केन्द्र तोक्न कस्सिएको हो । सरकारले आजै प्रदेश प्रमुख पनि तोक्ने तयारी गरेको छ । प्रधानमन्त्री देउवा यसका लागि सहमतीको नजिक पुगेको उनी निकट श्रोतले बतायो । दिउँसो साढे ४ बजे प्रधानमन्त्री निवास बालुवाटारमा बस्ने मन्त्री परिषद् बैठकबाट सातवटै प्रदेशमा प्रमुख र प्रदेशको अस्थाई केन्द्र तोक्ने सरकारले तयारी गरेको छ ।
अपडेट : प्रतिपक्षसंग सहमती गरेर लिएको निर्णय दिगो हुनसक्ने भन्दै प्रम देउवाले प्रतिपक्षसंग सहमतीको अन्तिम कसरत गरिरहेछन । सहमतिको लागि समय अपुग भएको भन्दै आज बोलाइएको क्याबिनेट बैठक सारिएको छ ।
